تۇركيادا قازاقستاندىق ستۋدەنتتەردىڭ قۇرىلتايى ءوتتى
تۇركيانىڭ ىستانبۇل قالاسىندا قازاقستان ستۋدەنتتەرىنىڭ قۇرىلتايى ءوتتى، دەپ حابارلايدى قازاقپارات.
ق ر سىرتقى ىستەر مينيسترلىگىنەن ءمالىم ەتكەندەي، شارانى قازاقستاننىڭ تۇركياداعى ەلشىلىگى مەن ىستانبۇلداعى باس كونسۋلدىعىنىڭ قولداۋىمەن «بىرلىك قازاق جاستارى» ستۋدەنتتەر ۇيىمى ۇيىمداستىردى.
قۇرىلتايدىڭ باستى ماقساتى - تۇركيادا ءبىلىم الىپ جاتقان جانە وسى جىلى وقۋدى باستاعان جاستاردىڭ باسىن قوسىپ، ولارعا باعدار بەرۋ.
جيىنعا قازاقستاننىڭ ىستانبۇلداعى باس كونسۋلى نۋريددين امانقۇل، قوعام قايراتكەرلەرى جانە قازاق دياسپوراسىنىڭ بەلسەندى ازاماتتارى قاتىستى.
«ستۋدەنتتەردىڭ باسىم كوپشىلىگى ىستانبۇلعا جاڭادان كەلىپ جاتقان جاستار بولعاندىقتان باس كونسۋل ن. امانقۇل ولاردى جاڭا وقۋ جىلىمەن قۇتتىقتاپ، شەت ەلدە بولۋ زاڭدارىن قاتاڭ ساقتاۋدى ەسكەرتتى. سونداي-اق ستۋدەنتتەرگە كونسۋلدىق تاراپىنان ءاردايىم قولداۋ كورسەتىلەتىندىگىن جەتكىزىپ، الداعى ۋاقىتقا ورتاق ءىس-شارالار وتكىزۋ ماسەلەسى تالقىلاندى»، - دەلىنگەن باسپا ءسوز حابارلاماسىندا.
