تۇركيادا قازاقستان ايەلدەر قۇراماسىنان بىردە-ءبىر سپورتشى شيرەك فينالعا شىعا المادى

استانا. KAZINFORM - تۇركيانىڭ ستامبۇل قالاسىندا كۇرەس تۇرلەرىنەن پاريج وليمپياداسىنىڭ سوڭعى جولدامالارى ساراپقا سالىنىپ جاتىر. ليسەنزيالىق تۋرنيردە قازاقستان ايەلدەر قۇراماسىنىڭ سپورتشىلارى شيرەك فينالعا جەتپەي جەڭىلىپ قالدى.

53 كەلىدەگى مارينا سەدنيەۆا ەكىنشى اينالىمدا پولشالىق قارسىلاسىنا 0:9 ەسەبىمەن جول بەرسە، 57 كەلىدەگى لاۋرا الماعانبەتوۆا 1/8 اينالىمدا تۇركيالىق ەلۆيرا كامالوعلىعا 2:4 ەسەبىمەن جول بەردى.

ال، 62 كەلىدەگى يرينا كۋزنەتسوۆا مەكسيكالىق قارسىلاسىنان 8:13 ەسەبىمەن جەڭىلىس تاپسا، ۇلتتىق قۇرامانىڭ ۇزدىك بالۋاندارىنىڭ ءبىرى سانالاتىن 68 كەلىدەگى ەلەنا شالىگينا رۋمىنيالىق سپورتشىدان 1:9 ەسەبىمەن ەسە جىبەردى.

سونداي-اق 76 كەلىدەگى ريو وليمپياداسىنىڭ قولا جۇلدەگەرى ەلميرا سىزدىقوۆا دا ءبىرىنشى اينالىمدا ەستونيالىق بالۋاننان 1:2 ەسەبىمەن جەڭىلدى.

ەستەرىڭىزگە سالا كەتەيىك، بۇگىنگى ۋاقىتتا كۇرەس تۇرلەرىنەن وليمپيادا ويىندارىنا 7 جولداما بار. ونىڭ 4 ەۋىن گرەك-ريم كۇرەسىنىڭ وكىلدەرى يەلەنسە، 3 ەۋى - ەركىن كۇرەس شەبەرلەرىنىڭ ەنشىسىندە.

وكىنىشكە قاراي بالۋان قىزدارىمىز ءالى بىردە-ءبىر جولداماعا قول جەتكىزە العان جوق.

ايەلدەر كۇرەسىنەن سايىستار ەرتەڭ، ياعني، 11-مامىر كۇنى مارەسىنە جەتەدى.

اۆتور كۇنسۇلتان وتارباي