تۇركيادا نەكەگە تۇرعان جاستارعا پايىزسىز نەسيە بەرىلەدى
استانا. KAZINFORM - تۇركيا پرەزيدەنتى رەجەپ تايىپ ەردوعان 2025 -جىلدى «وتباسى جىلى» دەپ جاريالاپ، ءبىرقاتار باستاما ۇسىندى، دەپ حابارلايدى Kazinform مەنشىكتى ءتىلشىسى.
نەگىزگى باستامالاردىڭ ءبىرى - نەكەگە تۇرعان جاستارعا پايىزسىز نەسيەنى ەنگىزۋ بولدى. نەسيە سوماسى 150000 تۇرىك ليراسىن (شامامەن 2,3 ميلليون تەڭگە) قۇرايدى. ول 48 ايعا بەرىلەدى. بۇل رەتتە نەسيەنى وتەۋ مەرزىمىن ەكى جىلعا كەيىنگە قالدىرۋ تەتىكتەرى دە قاراستىرىلعان. بۇل ۇسىنىس جاس جۇبايلاردىڭ قارجىلىق اۋىرتپالىعىن ازايتىپ، ولاردىڭ بىرگە باقىتتى ءومىر سۇرۋىنە سەپتىگىن تيگىزەدى.
سونىمەن قاتار، جاڭا باعدارلاما اياسىندا بالا تۋعاندا بەرىلەتىن جاردەماقى مولشەرى دە وسەدى:
ءبىرىنشى بالا ءۇشىن اتا- انالار 5000 ليرا (شامامەن 80 مىڭ تەڭگە) مولشەرىندە ءبىرجولعى تولەم الادى؛
ەكىنشى بالا ءۇشىن اي سايىن 1500 ليرا تولەنەدى (شامامەن 23 مىڭ تەڭگە)؛
ءۇشىنشى جانە ءاربىر كەيىنگى بالا ءۇشىن وتباسى اي سايىن 5000 ليرا الادى (شامامەن 80 مىڭ تەڭگە) .
پرەزيدەنت ەردوعان بۇل شارالار وتباسىلاردىڭ ءال- اۋقاتىن جاقسارتۋعا، جاس اتا- انالاردى قولداۋعا جانە بالا تۋۋ كورسەتكىشىن ارتتىرۋعا باعىتتالعانىن اتاپ ءوتتى.
- مىقتى وتباسى - ءبىزدىڭ قوعامنىڭ نەگىزى. جاستار بولاشاققا سەنىممەن قاراپ، وتباسىن قۇرۋعا ۇمتىلاتىنداي جاعداي جاساۋعا مىندەتتىمىز، - دەدى ول.
ايتا كەتەيىك، «2025 - جىل - وتباسى جىلى» باعدارلاماسى - تۇركياداعى دەموگرافيالىق جاعدايدى جاقسارتۋعا باعىتتالعان ۇكىمەتتىڭ جان- جاقتى ستراتەگياسى سانالادى. بۇل شارالار قوعامدا قولداۋعا يە بولىپ، ءتۇرلى سىنعا دا تاپ بولدى. باستامانى جاقتاۋشىلار ونىڭ دەموگرافيالىق سىن- قاتەرلەردى شەشۋدەگى ماڭىزدىلىعىن اتاپ وتسە، سكەپتيكتەر ازاماتتاردىڭ ءومىر ءسۇرۋ جاعدايلارىن جاقسارتۋ ءۇشىن تەرەڭدەتىلگەن ەكونوميكالىق رەفورمالاردىڭ قاجەت ەكەنىن العا تارتادى.
