تۇركيادا ەكى اسكەري تىكۇشاقتىڭ سوقتىعىسۋى سالدارىنان بەس ادام قازا تاپتى

استانا. KAZINFORM - تۇركيانىڭ ىسپارتا پروۆينتسياسىندا وقۋ-جاتتىعۋ كەزىندە ەكى اسكەري تىكۇشاق سوقتىعىستى. اپات سالدارىنان بەس اسكەري قىزمەتكەر، سونىڭ ىشىندە اسكەري اۆياتسيا ۋچيليشەسىنىڭ كومانديرى قازا تاپتى.

رەسمي مالىمەت بويىنشا، وقيعا تۇرىك اسكەري-اۋە كۇشتەرىنىڭ كەزەكتى جاتتىعۋلارى اياسىندا مانيەۆر جاساۋ كەزىندە بولعان. سوقتىعىس بولعان كەزدە ەكى تىكۇشاق تا تومەن بيىكتىكتە اۋەدە بولعان.

وقيعا ورنىنا جەدەل قىزمەت جونەلتىلدى، ءبىراق تىكۇشاق بورتىنداعى اسكەري قىزمەتكەرلەردىڭ بارلىعى قازا تاپتى. وقيعا ورنىندا قازا تاپقانداردىڭ اراسىندا بريگادا گەنەرالى دا بار. ءبىر سارباز ەكىنشى اسكەري تىكۇشاقپەن اۋىر حالدە جاقىن ماڭداعى مەديتسينالىق مەكەمەگە جەتكىزىلدى.

تۇركيانىڭ ۇلتتىق قورعانىس مينيسترلىگى وقيعاعا قاتىستى تەرگەۋ باستالعانىن حابارلادى. ساراپشىلار بولعان جاعدايدىڭ بىرنەشە نۇسقاسىن قاراستىردى، ونىڭ ىشىندە تەحنيكالىق اقاۋلار، اۋا رايى جاعدايلارى جانە ۇشۋدى باسقارۋ نەمەسە ۇيلەستىرۋدەگى قاتەلەر بولۋى مۇمكىن. بولاشاقتا وسىنداي قايعىلى وقيعالاردى بولدىرماۋ ءۇشىن قاۋىپسىزدىك حاتتامالارى مەن وقۋ رەيستەرىن قايتا قاراۋ قاجەت.

ىسپارتا گۋبەرناتورى ابدۋللا ەرين اپاتتىڭ جاتتىعۋ كەزىندە ەكى تىكۇشاقتىڭ سوقتىعىسۋى سالدارىنان بولعانىن ايتتى. بيلىك قازا تاپقانداردىڭ تۋىستارىنا كوڭىل ايتىپ، قارۋلى كۇشتەردەگى قاۋىپسىزدىكتى قامتاماسىز ەتۋ باستى ماسەلە بولىپ قالا بەرەتىنىن اتاپ ءوتتى.

وسىعان دەيىن تۇركيانىڭ مۇناي وڭدەۋ زاۋىتىندا جارىلىس بولعانىن جازعان ەدىك.