تۇركيادا جۇمىس اپتاسى 35-40 ساعاتقا دەيىن قىسقارتىلماق

استانا. KAZINFORM - تۇركيا ۇكىمەتى ەڭبەك كودەكسىنە جۇمىس اپتاسىن 48 ساعاتتان 35-40 ساعاتقا دەيىن قىسقارتۋى مۇمكىن زاڭنامالىق تۇزەتۋلەردى دايىنداۋعا كىرىستى، دەپ جازادى ت ا س س.

Sabah گازەتىنىڭ حابارلاۋىنشا، بيلىك سالالار بويىنشا ەرەكشەلەنەتىن ەڭبەك زاڭدارىن بىرىكتىرىپ، جۇمىسپەن قامتۋ سەكتورى ءۇشىن كەشەندى جانە ءبىرىڭعاي رەتتەۋدى ازىرلەۋدى جوسپارلاپ وتىر.

1936-جىلى بەكىتىلگەن ەڭبەك تۋرالى زاڭدا جۇمىس نورماسى كۇنىنە 8 ساعات جانە اپتاسىنا 48 ساعات دەپ بەلگىلەنگەن. 2003-جىلى ەڭبەك زاڭى قايتا قارالىپ، ودان كەيىن جۇمىس اپتاسى 45 ساعاتقا قىسقارعان. الايدا، بۇل نورمالار جالپىعا بىردەي قولدانىلمايدى. وسىلايشا، ب ا ق سەكتورىندا جانە تەڭىز ەڭبەك زاڭناماسىندا 48 ساعاتتىق جۇمىس اپتاسى نورما بولىپ قالا بەرەدى، ال باسقا سالالاردا 45 ساعاتتىق اپتالىق نورما قولدانىلادى. بۇل رەتتە قىزمەتكەر جىلىنا 270 ساعاتقا دەيىن ۇستەمە جۇمىسقا تارتىلۋى مۇمكىن.

ۇكىمەت بارلىق كاسىپتىك توپتار ءۇشىن ەرەجەلەردى ءبىر جۇيەگە كەلتىرىپ، اپتاسىنا 35-40 جۇمىس ساعاتىن نورما جانە ۇستەمە جۇمىستىڭ جاڭا نورمالارى رەتىندە ەنگىزۋدى كوزدەپ وتىر. بۇل وزگەرىستەردى تەحنولوگيالاردى دامىتۋدىڭ اعىمداعى جاعدايىن ەسكەرە وتىرىپ ازىرلەۋ جوسپارلانعان، بۇل پروتسەستەردىڭ تيىمدىلىگىن ارتتىرۋ ارقىلى جۇمىس ۋاقىتىن قىسقارتۋعا مۇمكىندىك بەرەدى. سونىمەن قاتار، جۇمىسقا قابىلدانعان قىزمەتكەرلەردىڭ قۇقىقتارىنا، سىياقىلاردىڭ نورمالارى مەن مولشەرلەرىنە، ۇستەمە جۇمىس كوەففيتسيەنتتەرىنە، الەۋمەتتىك كەپىلدىكتەرگە قاتىستى كەيبىر زاڭنامالىق نورمالاردى قايتا قاراۋ جوسپارلاندى. بۇل ەرەجەلەردى قايتا قاراۋ - قىزمەتكەرلەردىڭ مۇددەسى ءۇشىن جاسالاتىنى ايتىلدى.