تۇركيادا جالعان الكوگولدەن زارداپ شەككەندەر سانى 30 عا جەتتى
استانا. KAZINFORM - تۇركيادا جالعان الكوگولدەن زارداپ شەككەندەر سانى ءالى ارتىپ، سوڭى قايعىلى جاعدايعا ۇلاسىپ وتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

تۇركيادا جالعان الكوگولدەن زارداپ شەككەندەر سانى 30 عا جەتتى
ىستانبۇل بيلىگى سوڭعى 72 ساعاتتا الكوگولدەن ۋلانۋدىڭ 80 وقيعاسى تىركەلگەنىن، ونىڭ 30 ى ولىممەن اياقتالعانىن حابارلادى. قالالىق اۋرۋحانالاردا 49 ادام ەمدەلىپ جاتىر، ونىڭ 31 ءى جالعان الكوگولدەن ۋلانىپ، جانساقتاۋ بولىمىندە جاتىر. جالپى، جىل باسىنان بەرى قازا تاپقاندار سانى 41 ادامعا ءوستى.
تەرگەۋ بارىسىندا كونترافاكتىلىك الكوگول ءونىمىنىڭ قاي جەردە ساتىلعانى انىقتالدى. بەلگىلى بولعانداي، ىستانبۇلدىڭ باشاكشەحير اۋدانىندا «تۇركىمەن اسحاناسى» دەگەن جازۋمەن كادىمگى اۋىز سۋ اتىن جامىلعان جالعان الكوگول بوتەلكەلەرى 30 تۇرىك ليراسىنان (شامامەن 455 تەڭگە) ساتىلىپ جاتقان. ۋلى الكوگولدى زاڭسىز ساتۋ ناتيجەسىندە ءدامحانانىڭ جۇمىسى توقتاتىلىپ، ءۇي- جايلارى مورلەندى.

قالا بيلىگى تەكسەرۋ جۇمىستارىن جالعاستىرىپ، تۇرعىنداردى الكوگولدىك ونىمدەردى ساتىپ العاندا اباي بولۋعا شاقىردى. مۇنداي قايعىلى وقيعالاردى بولدىرماۋ ءۇشىن الكوگولدى تەك سەنىمدى جەرلەردەن ساتىپ الۋ ۇسىنىلدى.
بۇعان دەيىن ىستانبۇلدا سەرتيفيكاتى جوق الكوگولدى ىشىمدىكتەردى ءىشىپ، بىرنەشە كۇن ىشىندە 19 ادام قايتىس بولعانىن، تاعى 65 ادامنىڭ اۋىر ۋلانۋ بەلگىلەرىمەن اۋرۋحاناعا جاتقىزىلعانىن جازعان ەدىك.