تۇركيادا «ءبارى ىشىندە» فورماتىن قايتا قاراۋ ۇسىنىلدى
تۇركيا تۋريزم يندۋسترياسى وكىلدەرى قوناقۇيلەردەگى تۋريستەر قانداي تاعام مەن سۋسىنعا تولەيتىنىن ءوزى تاڭدايتىن «ءبارى ىشىندە» (all inclusive) فورماتىن قايتا قاراۋدى ۇسىندى.
ءبىراق قالىپتاسىپ قالعان جانە شەتەلدىكتەر اراسىندا تانىمال جۇيە ساقتالادى، دەپ اتاپ ءوتتى جەرورتا تەڭىزى قوناق ءۇي جانە وپەراتورلار قاۋىمداستىعى باسشىسى كاان كاۆالوگلۋ. Kazinform بۇل تۋرالى تاسسقا سىلتەمە جاساپ حابارلايدى.
Turizm Gazetesi گازەتىندە جاريالانعان كاسىپكەر پىكىرىنشە، تۇركيادا ەكونوميكالىق جاعداي قيىنداعاندىقتان شىعىن ارتقان، بۇل جاعداي تۋريستەرگە ارنالعان جاڭا قىزمەت تۇرلەرىن جاساۋعا مۇمكىندىك بەرەدى.
«ۇسىنىلىپ وتىرعان «قانشا پايدالانساڭ - سونشا تولە» اتاۋىنا يە بولعان ۇلگى بارىنەن بۇرىن all inclusive- ءتىڭ الكوگولسىز نۇسقاسىنا ۇقسايدى. ول وسى جۇيەنىڭ ءبىر بولىگى بولادى»، - دەدى كاۆالوگلۋ.
تۇركيادا الكوگولسىز all inclusive جۇيەسى بار قوناق ۇيلەر جەتكىلىكتى. ءبىراق مۇنداي تۋريستىك ءونىم كوپشىلىك اراسىندا تانىمال ەمەس جانە قالىپتاسقان جۇيەگە بالاما بولا المايدى، - دەپ حابارلادى تۇركيا تۋريستىك اگەنتتىكتەر قاۋىمداستىعى.
«بۇل ماسەلە تاڭداۋعا كەلىپ تىرەلەدى، بىرەۋلەر دەمالىستىڭ حالال ءتۇرىن، ەندى ءبىرى ءداستۇرلى ۇلگىسىن قالايدى. تۋر ساتىپ الىپ جاتقان ادامدا تاڭداۋ قۇقىعى بار»، - دەدى اگەنتتىككە پىكىر ءبىلدىرۋشى.
تۋروپەراتورلاردىڭ دەرەگىنشە، الكوگولسىز all inclusive ادەتتەگى تۋرلاردان %7-10 ارزان بولادى. «قانشا پايدالانساڭ - سونشا تولەيسىڭ» فورماتى ءداستۇرلى پاكەتتەردەن قانشالىقتى ءتيىمدى بولاتىنى ايتىلماعان.
