تۇركيادا 16 جاسقا تولماعاندارعا الەۋمەتتىك جەلىنى پايدالانۋعا تىيىم سالىندى
استانا. KAZINFORM - تۇركيا ۇكىمەتى 16 جاسقا تولماعاندارعا الەۋمەتتىك جەلىنى شەكتەۋ جانە 18 جاسقا تولماعان بالالارعا جازانى قايتا قاراستىرۋ شارالارىن اياقتادى، دەپ حابارلايدى NTV.
جوباداعى بەس ءتۇرلى زاڭعا وزگەرتۋلەر مەن تولىقتىرۋلار ەنگىزۋ كوزدەلگەنى حابارلانىپ، 17 باپتان تۇراتىن توپتاما دايىندالدى. بۇل پاكەت ەكى نەگىزگى بلوكتى قامتيدى: «بالالار قىلمىسىمەن كۇرەسۋ پروتسەدۋرالارى» جانە «بالالاردى سيفرلىق تاۋەكەلدەردەن قورعاۋ ەرەجەلەرى».
سيفرلىق تاۋەكەلدەردەن قورعاۋ شەڭبەرىندە الەۋمەتتىك جەلى قىزمەتىنىڭ وپەراتورلارى 15 جاسقا تولماعان بالالارعا قىزمەت كورسەتپەيدى، ياعني حالىقارالىق دەڭگەيدە بەلسەندى قولدانىلاتىن الەۋمەتتىك جەلىلەردى 16 جاسقا تولماعان بالالار پايدالانا المايدى.
كامەلەتكە تولماعاندار اراسىنداعى قۇقىقبۇزۋشىلىق تۋرالى بولىمدە 15 پەن 18 جاس ارالىعىنداعى قىلمىس جاساعان ادامدار قامتىلعان. قولدانىستاعى زاڭناماعا سايكەس جازا وسى جاستاعى ادامدارعا جەڭىلدەتىلدى. جاڭا ەرەجەلەرگە سايكەس، اۋىر قىلمىستار ءۇشىن جازا مەرزىمى ۇزارتىلادى: مىسالى، اۋىرلاتىلعان ءومىر بويىنا باس بوستاندىعىنان ايىرۋ جازاسىنىڭ ورنىنا بەرىلەتىن 24 جىلعا باس بوستاندىعىنان ايىرۋ جازاسى 27 جىلعا دەيىن، ال ءومىر بويىنا باس بوستاندىعىنان ايىرۋ جازاسىنىڭ ورنىنا بەرىلەتىن 15 جىلعا باس بوستاندىعىنان ايىرۋ جازاسى 18 جىلعا دەيىن ۇلعايتىلۋى مۇمكىن.
سونداي-اق جوبادا ەگەر قىلمىس قاساقانا نەمەسە اۋىر زارداپتارعا اكەپ سوققان بولسا، نە ادام بۇرىن قاساقانا قىلمىس جاساعان بولسا، سوتتىڭ جازانى جەڭىلدەتپەۋگە قۇقىعى بار ەكەنى دە قاراستىرىلعان.
ەسكە سالا كەتەيىك، تۇركيا پارلامەنتىنىڭ سپيكەرى جاڭا كونستيتۋتسيا قابىلداۋعا شاقىردى.
