تۇركياداعى زاۋىتتا بولعان جارىلىستان 10 ادام قازا تاپتى
استانا. KAZINFORM - تۇركيانىڭ يزمير پروۆينتسياسىنداعى HABAŞ مەتاللۋرگيا زاۋىتىندا بولعان جارىلىستان 10 جۇمىسشى قازا تاۋىپ، تاعى 15 ادام جاراقات الدى.
جارىلىس كوپىرلى كران قۇلاپ، گاز قۇبىرىنىڭ زاقىمدانۋىنان بولعان. بۇل تۋرالى Kazinform اگەنتتىگى Anadolu باسىلىمىنا سىلتەمە جاساپ حابارلادى.
يزمير پروۆينتسياسىنىڭ گۋبەرناتورى سۇلەيمان ەلباننىڭ مالىمەتىنشە، جارىلىس HABAŞ مەتاللۋرگيا زاۋىتىندا جوندەۋ جۇمىستارى كەزىندە جەرگىلىكتى ۋاقىت بويىنشا ساعات 11:46 شاماسىندا بولعان.
ونىڭ ايتۋىنشا، قازاندىقتى اۋىستىرۋ كەزىندە كوپىرلى كران قۇلاعان. قۇلاعان كونسترۋكتسيالار ەلەكتر دوعالى پەشكە ءتيىپ، تابيعي گاز قۇبىرىن زاقىمداعان. سونىڭ سالدارىنان بولات بالقىتۋ تسەحىندا جارىلىس بولعان.
وقيعا سالدارىنان 10 جۇمىسشى قازا تاپتى. ولاردىڭ ەكەۋى اۋرۋحانادا كوز جۇمسا، تاعى سەگىزى ءۇيىندى استىندا قالىپ، مەرت بولعان.
قازىر اۋرۋحانالاردا زارداپ شەككەن 15 ادام ەم قابىلداپ جاتىر. تورتەۋىنىڭ جاعدايى اۋىر، قالعان 11 ادامنىڭ جاراقاتى جەڭىلىرەك.
گۋبەرناتور جارىلىستىڭ ءوندىرىس پروتسەسى كەزىندە ەمەس، جوندەۋ جۇمىستارى بارىسىندا بولعانىن ناقتىلادى. وقيعا كەزىندە كاسىپورىندا ادەتتەگى 300 ادامنىڭ ورنىنا شامامەن 200 قىزمەتكەر بولعان. بولات بالقىتۋ جۇمىستارى جۇرگىزىلمەگەن.
ەلباننىڭ ايتۋىنشا، كاسىپورىن اۋماعىنداعى ىزدەستىرۋ-قۇتقارۋ جۇمىستارى اياقتالۋعا جاقىن. دەگەنمەن ماماندار ءالى دە بارلىق اۋماقتى تەكسەرىپ جاتىر.
- ءۇيىندى استىندا ءتورت ادام بولۋى مۇمكىن دەپ بولجاپ وتىرمىز. ولاردىڭ تاعدىرى انىقتالعانشا ىزدەستىرۋ-قۇتقارۋ جۇمىستارى جالعاسادى. قازىر ماماندار قۇلاعان كونسترۋكتسيالاردىڭ استىنداعى اۋماقتاردى تەكسەرىپ جاتىر، - دەدى گۋبەرناتور.
ول اۋىر جاراقات العان ءتورت ادامنىڭ يزميردەگى ءارتۇرلى اۋرۋحاناعا جەتكىزىلگەنىن، ال قالعان 11 زارداپ شەگۋشى الياگا مەملەكەتتىك اۋرۋحاناسىندا ەم قابىلداپ جاتقانىن ايتتى. جاراقاتى جەڭىلىرەك ءۇش ناۋقاستى باسقا مەديتسينالىق مەكەمەلەرگە اۋىستىرۋى مۇمكىن.
وقيعاعا قاتىستى باس پروكۋراتۋرا، ءتيىستى مينيسترلىكتەر مەن جەرگىلىكتى بيلىك وكىلدەرى اكىمشىلىك جانە سوت تەرگەۋىن جۇرگىزىپ جاتىر. ازىرشە ەشكىم ۇستالماعان. الايدا گۋبەرناتور الداعى ۋاقىتتا كۇدىكتىلەردىڭ ۇستالۋى مۇمكىن ەكەنىن ايتتى.
سۇلەيمان ەلبان تۇركيانىڭ ەڭبەك جانە الەۋمەتتىك قامسىزداندىرۋ ءمينيسترى ۆەدات ىشىكحان مەن ەنەرگەتيكا جانە تابيعي رەسۋرستار ءمينيسترى الپارسلان بايراكتاردىڭ انكارادان يزميرگە جولعا شىققانىن حابارلادى. سونداي-اق دەنساۋلىق ساقتاۋ ءمينيسترى كەمال مەميشوعلۋ دا وقيعا ورنىنا بارادى.
قازىر وندا گۋبەرناتورمەن بىرگە تۇركيا پارلامەنتىنىڭ ادىلەت جانە دامۋ پارتياسىنان دەپۋتاتتارى دجەيدا بەليۋنمەز چانكىرى مەن ماحمۋت اتيللا كايا، سونداي-اق الياگا قالاسىنىڭ اكىمى سەركان ادجار مەن مەنەمەن قالاسىنىڭ اكىمى ايدىن پەحليۆان ءجۇر.
