تۇركيادان قازاقستانعا ۇشاتىن رەيستەر سانى ەكى ەسەگە جۋىق ارتادى

قازاقستان دەلەگاتسياسىن قازاقستان رەسپۋبليكاسى كولىك مينيسترلىگى ازاماتتىق اۆياتسيا كوميتەتىنىڭ ءتوراعاسى سالتانات تومپيەۆا، ال تۇرىك دەلەگاتسياسىن تۇركيا رەسپۋبليكاسىنىڭ ازاماتتىق اۆياتسيا باس باسقارماسىنىڭ باس ديرەكتورى، پروفەسسور، دوكتور كەمال يۋكسەك باسقاردى.

كەلىسسوزدەر قورىتىندىسى بويىنشا 2026-جىلعى 14-تامىزدا تاراپتار ازاماتتىق اۆياتسيا سالاسىنداعى ىنتىماقتاستىقتى ودان ءارى نىعايتۋعا جانە ەكى ەل اراسىنداعى اۋە قاتىناسىن كەڭەيتۋگە باعىتتالعان ءوزارا تۇسىنىستىك تۋرالى جاڭا مەموراندۋمعا قول قويدى.

قول جەتكىزىلگەن ۋاعدالاستىقتارعا سايكەس، نەگىزگى باعىتتار بويىنشا (ىستانبۇلدان استانا، الماتى جانە شىمكەنت قالالارىنا، انكارادان استانا جانە الماتى قالالارىنا) ەكى تاراپتىڭ اۋەكومپانيالارى ءۇشىن رۇقسات ەتىلگەن رەيستەر سانى اپتاسىنا 76 دان 138 رەيسكە دەيىن ۇلعايتىلدى.

تۋريستىك باعىتتار بويىنشا (انتاليا جانە بودرۋم قالالارىنان قازاقستان قالالارىنا) رەيستەر سانى اپتاسىنا 44 تەن 86 رەيسكە دەيىن ارتتىرىلدى.

وسىلايشا، جوعارىدا اتالعان باعىتتار بويىنشا رۇقسات ەتىلگەن رەيستەردىڭ جالپى سانى اپتاسىنا 120 دان 224 رەيسكە دەيىن كوبەيدى.

قالعان بارلىق باعىتتار بويىنشا ەكى تاراپتىڭ اۋە كومپانيالارىنا اپتاسىنا 14 رەيسكە دەيىن ورىنداۋعا مۇمكىندىك كوزدەلدى. بۇل تىكەلەي اۋە قاتىناسىن كەڭەيتۋگە جانە وڭىرلىك كولىك بايلانىستىلىعىن دامىتۋعا جاعداي جاسايدى.

سونىمەن قاتار، ەكى تاراپ ءۇشىنشى ەلدەرگە تاسىمالداردى جۇزەگە اسىرۋ ماقساتىندا اۋە ەركىندىگىنىڭ بەسىنشى دارەجەسىن پايدالانا وتىرىپ، 76 عا دەيىن جۇك رەيسىن ورىنداۋ تۋرالى ۋاعدالاستىققا قول جەتكىزدى.

كەلىسسوزدەر بارىسىندا تاراپتار ازاماتتىق اۆياتسيانىڭ كەڭ اۋقىمدى باعىتتارى بويىنشا ىنتىماقتاستىقتى جانداندىرۋ جونىندە دە ۋاعدالاستى. اتاپ ايتقاندا، اۋە كولىگىن مەملەكەتتىك رەتتەۋ، ۇشۋ قاۋىپسىزدىگى مەن اۆياتسيالىق قاۋىپسىزدىكتى قامتاماسىز ەتۋ، اۆياتسيالىق وقيعالاردى تەرگەپ-تەكسەرۋ، اۋەجاي ينفراقۇرىلىمىن دامىتۋ جانە سالانى سيفرلاندىرۋ ماسەلەلەرى قامتىلدى.

قول جەتكىزىلگەن ۋاعدالاستىقتار قازاقستان مەن تۇركيا اراسىنداعى ستراتەگيالىق ارىپتەستىكتى ودان ءارى دامىتۋ جولىنداعى ماڭىزدى قادام بولدى.

- اۋە قاتىناسىنىڭ كەڭەيۋى اۋە تاسىمالدارىنا ءوسىپ كەلە جاتقان سۇرانىستى قاناعاتتاندىرۋعا، جولاۋشىلار مەن بيزنەس ءۇشىن جاڭا مۇمكىندىكتەر اشۋعا، تۋريستىك اعىنداردىڭ ودان ءارى وسۋىنە، ساۋدا-ەكونوميكالىق بايلانىستاردى نىعايتۋعا جانە ەكى دوستاس مەملەكەت اراسىنداعى ىنتىماقتاستىقتى دامىتۋعا ىقپال ەتەدى، - دەلىنگەن حابارلامادا.

وسىعان دەيىن قازاقستان مەن تۇركيا اراسىندا اۋە رەيستەرى كوبەيەتىنى تۋرالى جازدىق.