تۇركيادا ءىرى ءدىني قاۋىمداستىق جەتەكشىسىنىڭ اعاسىنان 200 كەلى التىن انىقتالدى
استانا. KAZINFORM - تۇركياداعى «سۇلەيماندجيلار» ءدىني قاۋىمداستىعىنا قاتىستى تەرگەۋ اياسىندا كوپ مولشەردە التىن مەن قولما-قول اقشا تاركىلەندى، دەپ حابارلايدى Kazinform اگەنتتىگىنىڭ انكاراداعى مەنشىكتى ءتىلشىسى.
«سۇلەيماندجيلار» (سۇلەيمەنشىلەر) - تەولوگ سۇلەيمەن حيلمي تۋناحاننىڭ ىلىمدەرىمەن بايلانىستى تۇرىكتىڭ ءىرى ءدىني قاۋىمداستىعى. ۇيىم ەلدەگى ءدىني ءبىلىم بەرۋ مەكەمەلەرى مەن جاتاقحانالار جەلىسىمەن تانىمال.
الايدا تۇركياداعى «سۇلەيماندجيلار» ءدىني قوزعالىسىنا قاتىستى تەرگەۋ جانە اۋقىمدى ارنايى وپەراتسيا ءىرى كولەمدەگى قارجىلىق قىلمىستار، الاياقتىق جانە ۇيىمداسقان قىلمىستىق توپ قۇرۋ كۇدىكتەرىنە بايلانىستى جۇرگىزىلىپ جاتىر.
التىن قاۋىمداستىق جەتەكشىسى ءاليحان كۋريشتىڭ اعاسى حيلمي تۋنا كۋريشپەن بايلانىستى مەكەنجايدا ءتىنتۋ كەزىندە تابىلدى. حيلمي تۋنا كۋريشتىڭ وزىنە ىزدەۋ جاريالاندى.
تۇركيانىڭ قۇقىق قورعاۋ ورگاندارىنىڭ مالىمەتىنشە، تابىلعان التىننىڭ قۇنى 1,34 ميلليارد تۇرىك ليراسىنا باعالانىپ وتىر - بۇل 30 ميلليون دوللاردان اسادى. تەرگەۋشىلەر التىن قۇيمالارىنىڭ شىعۋ تەگىن انىقتاپ، ۇيىمنىڭ قارجىلىق اعىنىن تەكسەرىپ جاتىر.
تەرگەۋدى انكارا پوليتسياسى پروكۋراتۋرانىڭ ۇيلەستىرۋىمەن جۇرگىزىپ جاتىر. اتالعان ءىس اياسىندا بارلىعى 38 ادام ۇستالدى، ولاردىڭ 32 ءسى قاماۋعا الىندى، ال تاعى التاۋى سوت باقىلاۋىندا.
وسىعان دەيىن تۇركيادا دايش-پەن (قازاقستان رەسپۋبليكاسىندا تىيىم سالىنعان ۇيىم - رەد.) بايلانىسى بار دەگەن كۇدىكپەن 104 ادام ۇستالعانىن حابارلادىق.
