تۇركيا يزرايل پرەزيدەنتى ءۇشىن اۋە جولىن جاۋىپ تاستادى
استانا. KAZINFORM — يزرايل بيلىگى باكۋدە ءوتىپ جاتقان بىرىككەن ۇلتتار ۇيىمىنىڭ (ب ۇ ۇ) كليماتتىڭ وزگەرۋى جونىندەگى تاراپتاردىڭ 29-كونفەرەنتسياسىنا (COP29) قاتىسۋدى جوسپارلاعان يزرايل پرەزيدەنتى يتسحاك گەرتسوگتىڭ ۇشاعى ءۇشىن تۇرىك اۋە كەڭىستىگىن پايدالانعىسى كەلدى، دەپ جازادى TRT.
تۇركيا يزرايل پرەزيدەنتى ۇشاعىنىڭ تۇرىك اۋە كەڭىستىگىن پايدالانۋ تۋرالى ءوتىنىشىن قابىلدامادى، ال يزرايل باسپا سوزىندە يتسحاك گەرتسوگتىڭ «قاۋىپسىزدىك ماسەلەلەرىنە» بايلانىستى ازەربايجان ساپارىنان باس تارتقانى تۋرال حابارلامالار تارادى.
COP29 11-22 قاراشا ارالىعىندا باكۋدە وتەدى. فورۋمنىڭ باستى تاقىرىبى - 2025 -جىلدان باستاپ كليماتتىڭ وزگەرۋىنە قارسى كۇرەس شارالارىن قارجىلاندىرۋ. سونىمەن قاتار، كونفەرەنسياعا قاتىسۋشىلار اتموسفەراعا پارنيكتىك گازدار شىعارىندىلارىن ازايتۋ بويىنشا الداعى جۇمىستاردى تالقىلايدى. قازاقستان پرەزيدەنتى قاسىم- جومارت توقايەۆ COP29 جاھاندىق كليمات سامميتىنە قاتىستى.
بۇعان دەيىن تۇركيانىڭ يزرايلمەن ساۋدا- ەكونوميكالىق قارىم- قاتىناستارىن توقتاتۋ شارالارىنىڭ ەكىنشى كەزەڭىن جۇزەگە اسىرۋعا كىرىسكەنىن جازعان بولاتىنبىز. وسى جاعدايعا بايلانىستى تاۋارلاردىڭ بارلىق توپتارى بويىنشا ەكسپورتتىق- يمپورتتىق وپەراتسيالار توقتاتىلدى.
كەيىن تۇركيانىڭ ساۋدا مينيسترلىگى يزرايل تاراپىنىڭ كەيبىر مالىمدەمەلەرىنە قاراماستان، يزرايلمەن ساۋدا- ەكونوميكالىق قارىم- قاتىناستار تولىعىمەن جابىلعانىن حابارلادى.
تۇركيانىڭ سىرتقى ىستەر مينيسترلىگى بىرىككەن ۇلتتار ۇيىمىنا حات جولداعانىن مالىمدەدى. وعان قول قويعان 52 مەملەكەت اراسىندا قازاقستان دا بار. سونىمەن قاتار حالىقارالىق ۇيىمدار - اراب مەملەكەتتەرى ليگاسى جانە يسلام ىنتىماقتاستىعى ۇيىمى بار. قۇجات باسىپ الىنعان پالەستينا تەرريتوريالارىندا، اسىرەسە گازا سەكتورىندا حالىقارالىق قۇقىق نورمالارىن بۇزۋدىڭ الدىن الۋ ءۇشىن يزرايلگە قارسى قارۋ- جاراق ەمبارگوسىن ەنگىزۋگە شاقىرادى.
