تۇركيا موسۋل ماڭىنداعى اسكەري بازاسىن يراكقا بەرمەك
استانا. KAZINFORM - كەلىسىم اياسىندا اسكەري نىسان بىرتىندەپ يراك ۇكىمەتىنىڭ باقىلاۋىنا بەرىلەدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تۇركيا يراكتىڭ سولتۇستىگىندەگى موسۋل قالاسىنىڭ ماڭىندا ورنالاسقان باشيكا-زەليكان اسكەري بازاسىن بىرتىندەپ يراكقا بەرەدى.
كەلىسىمگە سارسەنبى كۇنى نيۋ-يوركتە تۇركيا پرەزيدەنتى رەجەپ تايپ ەردوعان مەن يراك پرەمەر-ءمينيسترى ءالي ءال-زايديدىڭ كەزدەسۋى بارىسىندا قول جەتكىزىلدى.
بىرلەسكەن مالىمدەمەدە تاراپتار اسكەري بازا يراك بيلىگى قابىلداعان قاۋىپسىزدىك شارالارىن ەسكەرە وتىرىپ، كەلىسىلگەن تەتىك پەن كەستەگە سايكەس بەرىلەتىنىن مالىمدەدى. ناقتى مەرزىم رەسمي تۇردە جاريالانعان جوق.
كەلىسسوز بارىسىمەن تانىس يراك اسكەري قولباسشىسىنىڭ ايتۋىنشا، باشيكا-زەليكان بازاسىنان جانە موسۋل ماڭىنداعى تاعى ءبىر شاعىن نىساننان تۇرىك بولىمشەلەرىن كەزەڭ-كەزەڭىمەن شىعارۋ 2026-جىلدىڭ سوڭىنا دەيىن اياقتالۋى مۇمكىن. تۇركيا تاراپى بۇل اقپاراتقا ءالى تۇسىنىكتەمە بەرگەن جوق.
انكارا اسكەرىن موسۋل ماڭىنا 2015-جىلى ورنالاستىردى. تۇركيا ول اسكەردىڭ يراك كۇشتەرىن، سونداي-اق دايش تەرروريستىك توبىنا (قازاقستاندا تىيىم سالىنعان ۇيىم - رەد.) قارسى كۇرەسكەن جەرگىلىكتى اراب، تۇرىكمەن جانە كۇرد جاساقتارىن قورعاۋ جانە دايىنداۋمەن اينالىسقانىن مالىمدەگەن.
تۇرىك اسكەرىنىڭ موسۋل ماڭىنا ورنالاستىرىلۋى ەكى ەل اراسىندا كيكىلجىڭ تۋدىرعان.
يراكتىڭ ورتالىق ۇكىمەتى باشيكا اۋە بازاسىندا تۇرىك اسكەرىنىڭ بولۋىن ءوز ەگەمەندىگىن بۇزۋ دەپ ساناپ، ولاردىڭ شىعارىلۋىن بىرنەشە رەت تالاپ ەتتى. بازانى كوپ جىل بويى ايماقتاعى ءارتۇرلى قارۋلى توپتار ۇدايى زىمىرانمەن اتقىلاپ كەلدى.
انكارا بازا تەرروريستىك توپتارعا قارسى وپەراتسيالاردى قولداۋ ءۇشىن پايدالانىلعانىن ايتۋمەن كەلەدى.
نىساندى تاپسىرۋ تۇركيانىڭ يراكتان اسكەرىن تولىق الىپ كەتەتىنىن بىلدىرمەيدى. ەلدىڭ سولتۇستىگىندە باسقا تۇرىك بازالارى مەن بەكىنىستەرى قالا بەرمەك، ولاردى انكارا ءوزىنىڭ ۇلتتىق قاۋىپسىزدىگىن قامتاماسىز ەتۋ جانە كۇردىستان جۇمىسشى پارتياسىمەن (ك ج پ) كۇرەسۋ ءۇشىن قاجەت دەپ سانايدى.
ەردوعان مەن ءال-زايدي قاۋىپسىزدىك سالاسىنداعى ىنتىماقتاستىقتى نىعايتۋعا، سيندجار ايماعىندا يراكتىڭ تولىق باقىلاۋىن قالپىنا كەلتىرۋگە جانە ودان زاڭسىز ارەكەت ەتەتىن شەتەلدىك قارۋلى توپتاردى كەتىرۋگە كەلىستى.
تاراپتار سونداي-اق ساۋدا-ەكونوميكالىق قاتىناستاردى تالقىلاپ، بۇرىن قول قويىلعان كەلىسىمدەر مەن بىرلەسكەن ستراتەگيالىق جوبالاردى جۇزەگە اسىرۋدى جەدەلدەتۋگە كەلىستى.
ەسكە سالا كەتەيىك، بۇعان دەيىن ا ق ش 30-قىركۇيەككە دەيىن اسكەرىن يراكتان تولىق شىعاراتىنى حابارلانعان.
سونداي-اق، يراك يرانمەن شەكاراداعى ءۇش وتكىزۋ بەكەتىن قايتا اشتى.
