تۇركيا پورتتارىنان قازاقستانعا جۇك تاسىمالداۋ جەڭىلدەيدى

انتاليا قالاسىندا قازاقستان-تۇركيا اۆتوموبيل كولىگى جونىندەگى ارالاس كوميسسياسىنىڭ وتىرىسى ءوتتى.

وتىرىس قورىتىندىسى بويىنشا ەكى ەل اراسىنداعى حالىقارالىق اۆتوموبيل تاسىمالدارى مەن ترانزيتتى ودان ءارى دامىتۋ بويىنشا ناقتى ۋاعدالاستىقتارعا قول جەتكىزىلدى.

- تاراپتار ەلەكتروندىق رۇقساتتارعا ساندىق شەكتەۋ قويىلمايتىنى تۋرالى ۋاعدالاستى. بۇل كەلىسىم تاسىمالداردى نەعۇرلىم يكەمدى ۇيىمداستىرۋعا جانە تاسىمالداۋشىلاردىڭ قاجەتتىلىكتەرىنە جەدەل دەن قويۋعا مۇمكىندىك بەرەدى. ماڭىزدى ناتيجەلەردىڭ ءبىرى - قازاقستاندىق تاسىمالداۋشىلارعا تۇركيانىڭ تەڭىز پورتتارىنان قازاقستانعا كەيىننەن تاسىمالداۋ ءۇشىن جۇكتەردى تيەۋگە مۇمكىندىك بەرىلۋى، - دەلىنگەن حابارلامادا.

سونداي-اق تاراپتار 2026-جىلدان باستاپ وسىنداي ترانزيتتىك جۇكتەردى تاسىمالداۋعا جىل سايىن 3 مىڭنان رۇقسات بلانكىلەرىمەن ءوزارا الماسۋعا كەلىستى.

وتىرىسقا قاتىسۋشىلار ەكىجاقتى جانە ترانزيتتىك تاسىمالداردى ودان ءارى دامىتۋدىڭ ماڭىزدىلىعىن اتاپ ءوتىپ، ولاردىڭ قازاقستان مەن تۇركيا اراسىنداعى ساۋدا-ەكونوميكالىق ىنتىماقتاستىقتى كەڭەيتۋگە جانە كولىك-لوگيستيكالىق بايلانىستاردى نىعايتۋعا قوساتىن ۇلەسىن اتاپ ءوتتى.

كەزدەسۋ قورىتىندىسى بويىنشا تاراپتار قول جەتكىزىلگەن ۋاعدالاستىقتارعا قاناعاتتانۋشىلىق ءبىلدىرىپ، حالىقارالىق اۆتوموبيل تاسىمالدارى سالاسىنداعى ىنتىماقتاستىقتى ودان ءارى دامىتۋعا مۇددەلى ەكەندەرىن راستادى.

بۇدان بۇرىن تۇركيادا اياق كيىم ءوندىرىسى ءۇش جىلدا 41,6 پايىزعا ازايعانى بەلگىلى بولدى.