تۇركيا رەسەيدەن العان زىمىران كەشەنىن يراك شەكاراسىنا جاقىن ورنالاستىرۋى
استانا. KAZINFORM — تۇركيا رەسەيدەن ساتىپ العان C-400 زەنيتتى- زىمىران كەشەنىن كورشى يراكپەن شەكارا سىزىعىنا ورنالاستىرۋى مۇمكىن، دەپ جازادى ت ا س س.
Türkiye باسىلىمىنىڭ حابارلاۋىنشا، شەكارا ايماعىنا C -400 ءدى ورنالاستىرۋ پروتسەسى مۇسىلمانداردىڭ قۇربان ايت مەرەكەسى اياقتالعاننان كەيىن نەمەسە كەلەسى اپتادا جۇرگىزىلۋى مۇمكىن.
سونداي-اق، گازەت تۇركيا يراكتىڭ سولتۇستىگىن كۇردىستاننىڭ جۇمىسشى پارتياسىنان تازارتۋ ماقساتىندا ترانسشەكارالىق وپەراتسيا جۇرگىزۋ جوسپارلارىن دايىنداۋدى اياقتاعانىن، ايماققا اسكەري بولىمشەلەر مەن تىل بولىمدەرىن اۋىستىرۋ باستالعانىن حابارلايدى. باسىلىمنىڭ حابارلاۋىنشا، وپەراتسيا تۇرىك پرەزيدەنتى رەجەپ تايىپ ەردوعاننىڭ يراكقا ساپارىنان كەيىن جاسالۋى مۇمكىن. ساپار 22-ساۋىرگە جوسپارلانعان.
ەردوعان بۇدان بۇرىن تۇركيا جازعا قاراي يراكپەن شەكارا سىزىعىن تولىعىمەن باقىلاۋعا الىپ، سيرياداعى لاڭكەستىكپەن كۇرەس جۇمىسىن اياقتايتىنىن مالىمدەگەن. يراكتاعى وپەراتسيانىڭ ماقساتى -سولتۇستىك ايماقتاردى 40 شاقىرىم تەرەڭدىككە دەيىن كۇردىستان سودىرلارىنان تازارتۋ بولماق.
ستار گازەتىنىڭ حابارلاۋىنشا، ارميا وپەراتسياسى الدىندا شەكارالىق ايماقتاردا قاۋىپسىزدىك ايماقتارى قۇرىلىپ، كەيىننەن جاندارمەريا بولىمشەلەرىنىڭ باقىلاۋىنا وتەدى. وپەراتسياعا نەگىزىنەن قۇرلىق اسكەرلەرىنىڭ ارنايى جاساقتارى مەن جاندارمەريا اسكەرلەرى قاتىسادى. ولارعا تۇركيا اۋە كۇشتەرى اۋەدەن قولداۋ كورسەتىپ، ءبىرىنشى كەزەكتە كۇردىستان جۇمىس پارتياسىنىڭ نەگىزگى كۇشتەرى ورنالاسقان كانديل جانە گارا ايماقتارىنا سوققى بەرەدى.
تۇركيا بيلىگى ك ج پ- نى ۇلتتىق قاۋىپسىزدىككە تونگەن باستى قاۋىپ دەپ سانايدى. رەسپۋبليكا ارمياسى يراكتىڭ سولتۇستىگىندە جانە 2015 -جىلدان بەرى سيريانىڭ سولتۇستىك ايماقتارىندا كۇرد سودىرلارىنا قارسى وپەراتسيالاردى جۇيەلى تۇردە جۇرگىزىپ كەلەدى.
