تۇركيا قوناقۇيلەردىڭ جاپپاي جابىلۋى تۋرالى قاۋەسەتتى جوققا شىعاردى

استانا. KAZINFORM - سوڭعى كۇندەرى تۇرىك جانە حالىقارالىق ب ا ق- تا تۇركيا اۋماعىنداعى 4 مىڭنان استام قوناقۇيدىڭ جاپپاي جابىلعانى تۋرالى الاڭداتارلىق حابارلار تارادى، دەپ جازادى Kazinform اگەنتتىگىنىڭ مەنشىكتى ءتىلشىسى.

الايدا بۇل تۋريستەر اراسىندا الاڭداۋشىلىق تۋدىرعان جاڭالىقتى ەلدىڭ تۋريزم سالاسىنىڭ وكىلدەرى تەز ارادا جوققا شىعاردى.

ءىرى تۋريستىك حولدينگتەردىڭ ءبىرىنىڭ باسشىسى ورحان ساندجاردىڭ ايتۋىنشا، مۇندا كەنەتتەن بولعان جابىلۋلار ەمەس، كەيبىر قوناقۇيلەردىڭ جۇمىسىنداعى تەحنيكالىق جانە اكىمشىلىك كەمشىلىكتەردى جويۋعا ارنالعان ستاندارتتى پروتسەدۋرا تۋرالى ءسوز بولىپ وتىر. ول تۇركيا تۋريزم مينيسترلىگى زاڭ تالاپتارىنا ساي كەلۋ ءۇشىن نىساندارعا ۋاقىت بەرىپ وتىرعانىن اتاپ ءوتتى.

بۇل قاۋەسەتتەرگە سەبەپ بولعان - ادۆوكات ابيدە سارالۋ ايتقان مالىمدەمە. ول 4 مىڭ قوناقۇيدىڭ تۋريستىك نىسان سەرتيفيكاتى بولماعانى ءۇشىن مورلەنگەنىن ايتقان. ونىڭ سوزىنشە، 2021 -جىلدان باستاپ قوناقۇيلەر جەرگىلىكتى بيلىكتىڭ رۇقساتىمەن ۋاقىتشا جۇمىس ىستەي الاتىن بولعان، ءبىراق جارتى جىلدىڭ ىشىندە رەسمي سەرتيفيكات الۋعا مىندەتتى ەدى. كوپتەگەن قوناقۇيلەر بۇل تالاپتى ۋاقىتىندا ورىنداماعان.

الايدا ورحان ساندجار بۇل تەك ۋاقىتشا شارالار ەكەنىن، وتەلدەردە انىقتالعان كەمشىلىكتەر جويىلىپ جاتقانىن جانە تۋريستىك اگەنتتىكتەرگە الدىن الا برونداردىڭ جويىلۋى تۋرالى ەسكەرتۋ بەرىلەتىنىن اتاپ ءوتتى. ونىڭ ايتۋىنشا، 4 مىڭ دەگەن سان - قازىر زاڭ تالاپتارىنا سايكەستەندىرۋ جۇمىستارى ءجۇرىپ جاتقان نىسانداردىڭ جالپى سانى.

سونىمەن قاتار، ول تۋريستەرگە جولعا شىعار الدىندا ءوز وتەلىنىڭ ستاتۋسىن تەكسەرىپ، بروندى راستاۋعا كەڭەس بەردى.

- سالانىڭ جاعدايىندا ەشقانداي داعدارىس جوق، قوناقتار تۇراتىن ورىنسىز قالمايدى. ءبىراق تىنىشتىق ءۇشىن الدىن الا بروندى راستاعان دۇرىس، - دەدى ساندجار.

تۇرىك بيلىگى مەن قوناقجايلىلىق يندۋسترياسىنىڭ وكىلدەرى تۋريستەردى دۇرلىكپەۋگە، تەك رەسمي اقپارات كوزدەرىنە سۇيەنۋگە شاقىرادى.