تۇركيا قازاقستاننىڭ ەت ونىمدەرىنە قويىلعان شەكتەۋدى الىپ تاستادى
استانا. قازاقپارات - 2024 -جىلعى 7-ماۋسىمنان باستاپ قازاقستاندىق ءونىمدى تۇركيا نارىعىنا جەتكىزۋگە كەدەرگى بولعان ءبىرقاتار شەكتەۋلەر الىنىپ تاستالدى.

2005 -جىلدان بەرى قۇس تۇماۋى بويىنشا، 2016-جانە 2022 -جىلداردان بەرى اۋسىل جانە نودۋليارلىق دەرماتيت بويىنشا شەكتەۋلەر قولدانىلىپ كەلگەن بولاتىن، دەپ حابارلايدى ق ر ا ش م باسپا ءسوز قىزمەتى.
2024 -جىلدىڭ ناۋرىز ايىندا قازاقستان رەسپۋبليكاسىنىڭ اۋىل شارۋاشىلىعى ءمينيسترى ايداربەك ساپاروۆ تۇركى مەملەكەتتەرى ۇيىمىنا مۇشە ەلدەر مينيسترلەرىنىڭ تارازدا وتكەن كەزدەسۋىندە كەدەرگىلەر ماسەلەسىن كوتەرگەن بولاتىن.
"قازاقستان تۇركيا، تۇرىكمەنستان جانە ماجارستان نارىعىنا جوعارى ساپالى ەت ونىمدەرىن جەتكىزۋگە دايىن ەكەنىن بىلدىرەدى. وكىنىشكە قاراي، بۇگىنگى تاڭدا تۇركيا نارىعى ۆەتەرينارلىق قىزمەتتەر جەلىسى بويىنشا قازاقستاندىق جەتكىزۋشىلەر ءۇشىن ءىس جۇزىندە جابىق. بيىلعى جىلدان باستاپ ق ح ر مەن ر ف تاراپىنان قازاقستانعا قاتىستى وسىنداي شەكتەۋلەر الىنىپ تاستالعانىن اتاپ وتكىم كەلەدى. وسىعان بايلانىستى تۇرىك تاراپىمەن دە وسى ماسەلەنى قاراۋعا قايتا ورالۋعا بولادى دەپ ەسەپتەيمىز"،- دەپ اتاپ ءوتتى ايداربەك ساپاروۆ.
كەدەرگىلەردى الىپ تاستاۋ ماسەلەلەرى تۇركيا رەسپۋبليكاسى اۋىل شارۋاشىلىعى ءمينيسترىنىڭ ورىنباسارى گيزليگيدەر ەبۋبەكيرمەن ەكىجاقتى كەزدەسۋ بارىسىندا كەڭىنەن تالقىلاندى.
تۇپكىلىكتى شەشىم اعىمداعى جىلدىڭ مامىر ايىندا دۇنيەجۇزىلىك جانۋارلار دەنساۋلىعى ۇيىمىنىڭ 91- سەسسياسى اياسىندا ق ر اۋىل شارۋاشىلىعى ۆيتسە- ءمينيسترى ا. بەرداليننىڭ تۇركيانىڭ اۋىل شارۋاشىلىعى ۆيتسە- ءمينيسترى ا. گيۋمەنمەن وتكىزگەن ەكىجاقتى كەلىسسوزدەر ناتيجەسىندە قابىلداندى.
تۇرىك تاراپى قازاقستان ۇسىنعان ەسەپتەردى تالداپ، دۇنيەجۇزىلىك جانۋارلار دەنساۋلىعى ۇيىمىنا (د ج د ۇ) ۇسىنىپ، ءبىزدىڭ ەلىمىزدىڭ وسى اۋرۋلارمەن كۇرەسۋ جانە ولاردى جويۋ جونىندەگى ارەكەتتەرىن جوعارى باعالادى. بۇل شەشىم قازاقستانداعى اگروبيزنەستىڭ جاڭا پەرسپەكتيۆالارىن جانە مال شارۋاشىلىعى ونىمدەرىنە قويىلاتىن ۆەتەريناريالىق تالاپتاردى ۇيلەستىرۋ مۇمكىندىكتەرىن كەڭەيتەدى، وسى ەلدەر اراسىنداعى ساۋدا قاتىناستارىن نىعايتۋداعى ماڭىزدى قادام بولماق.
قازاقستاندىق مال شارۋاشىلىعى ونىمدەرىن ىلگەرىلەتۋدىڭ كەلەسى قادامى ۆەتەريناريالىق تالاپتاردى ۇيلەستىرۋ بولماق. بۇل ماسەلەلەر دە اعىمداعى جىلدىڭ تامىز ايىندا ايداربەك ساپاروۆتىڭ تۇركيا رەسپۋبليكاسىنا ساپارى بارىسىندا تالقىلاناتىن تاقىرىپتار تىزىمىنە ەنەتىن بولادى.
ەسكە سالايىق، بۇگىنگى تاڭدا قازاقستاننىڭ ءبىرقاتار وڭىرلەرىندە قوي مەن ەشكى شەشەگى بويىنشا شەكتەۋلەر ءالى دە بار. قالعان توسقاۋىلداردى الىپ تاستاۋ ءۇشىن ق ر ا ش م ۆەتەريناريالىق قىزمەتى قاجەتتى شارالاردى قابىلدايدى.