تۇركيا جاسوسپىرىمدەردىڭ الەۋمەتتىك جەلىنى پايدالانۋىنا شەكتەۋ ەنگىزدى

استانا. KAZINFORM - تۇركيادا بيىلدان باستاپ 16 جاسقا تولماعان جاسوسپىرىمدەردىڭ الەۋمەتتىك جەلىنى پايدالانۋىن شەكتەۋگە باعىتتالعان جاڭا ەرەجە كۇشىنە ەنەدى، دەپ حابارلايدى Kazinform مەنشىكتى ءتىلشىسى.

әлеуметтік желі
فوتو: bugin.kz

جاڭا زاڭعا سايكەس، جاس پايدالانۋشىلار الەۋمەتتىك جەلىگە اتا- اناسى نەمەسە قامقورشىسىنىڭ جازباشا كەلىسىمىمەن عانا تىركەلىپ، پايدالانا الادى.

ۇكىمەت بۇل شارانى بالالاردىڭ پسيحيكالىق دەنساۋلىعىن ساقتاۋ، كيبەربۋللينگ پەن زياندى كونتەنتكە ۇشىراۋدىڭ الدىن الۋ قاجەتتىلىگىمەن ءتۇسىندىردى. باستاما گادجەتتەرگە تاۋەلدىلىكتى ازايتۋعا جانە جاستاردى وففلاين ومىردە بەلسەندىرەك بولۋعا ىنتالاندىرۋعا باعىتتالعان.

تۇركيانىڭ كولىك جانە ينفراقۇرىلىم ءمينيسترى ابدۋلكادير ۋرالوگلۋ بۇكىل الەم الەۋمەتتىك جەلىلەرگە كىرۋدى شەكتەۋ ءۇشىن 13 پەن 16 جاس تۋرالى ايتىپ جاتقانىن اتاپ ءوتتى.

- پروتسەسس سالالىق مينيسترلىكتەرمەن، مەكەمەلەرمەن بىرلەسىپ جۇرگىزىلىپ جاتىر. ءبىز 16 جاسقا نازار اۋدارىپ، وسى باعىتتا ءبىراز جۇمىس ىستەيمىز جانە بالالارىمىزدى سانالى تۇردە قورعايمىز. 16 جاستاعى جاسوسپىرىمدەرىمىز ءبىلىم مەن دامۋعا كوبىرەك كوڭىل ءبولۋى كەرەك. تۇركيادا 16 جاستان اسقان بالالارعا الەۋمەتتىك جەلىلەرگە ەركىن كىرۋگە مۇمكىندىك بەرەمىز، - دەيدى مينيستر.

ۋاكىلەتتى ورگان بۇل شەشىم پسيحولوگيا سالاسىنداعى مامانداردىڭ ۇسىنىستارىنا، سونداي-اق وسىنداي شەكتەۋلەر ءوز تيىمدىلىگىن دالەلدەپ ۇلگەرگەن باسقا ەلدەردىڭ تاجىريبەسىنە نەگىزدەلگەنىن ايتتى.

الەۋمەتتىك مەديا پلاتفورمالارى جاستى تەكسەرۋ جانە اتا- انانىڭ كەلىسىمى بويىنشا ارنايى مەحانيزمدەردى ەنگىزۋى كەرەك دەپ كۇتىلىپ وتىر. ال تالاپتاردى بۇزعان كومپانيالار ايىپپۇل تولەيدى.

ەسكە سالا كەتسەك، تۇركيادا بالالاردىڭ الەۋمەتتىك جەلى مەن سمارتفون پايدالانۋىنا شەكتەۋ ەنگىزىلەتىنىن جازعان بولاتىنبىز.

سوڭعى جاڭالىقتار