تۇركيا حالقىنىڭ قانشا پايىزى ەسكى ۇيلەردە تۇراتىنى بەلگىلى بولدى

استانا. KAZINFORM - تۇركيادا تۇرعىن ءۇي جاعدايىن جاقسارتۋدى قاجەت ەتەتىن ادامداردىڭ سانى وتە كوپ. كوپتەگەن ازامات ەلدەگى ەسكى جانە قولايسىز تۇرعىن ۇيلەردە ءومىر ءسۇرىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

تۇركيا ستاتيستيكا ينستيتۋتىنىڭ (TÜİK) مالىمەتىنە سايكەس، ەل حالقىنىڭ شامامەن %31,3 ى كۇردەلى جوندەۋدى قاجەت ەتەتىن ۇيلەردە تۇرادى. سونىمەن قاتار، تۇرعىنداردىڭ %30,2 ى جىلىتۋ جۇيەسىنىڭ ماسەلەلەرىن باستان وتكەرۋدە، بۇل كوبىنەسە ۇيلەردەگى ءتيىستى جىلۋ وقشاۋلاۋىنىڭ جوقتىعىنان تۋىندايدى.

بۇل رەتتە ستامبۋل جوسپارلاۋ اگەنتتىگىنىڭ (İPA) باسشىسى بۋگرا گەكچە تۇركيا حالقىنىڭ %32 ى ناشار تۇرعىن ءۇي جاعدايىندا ءومىر سۇرەتىنىن اتاپ ءوتتى.

ونىڭ ايتۋىنشا، ءوز باسپاناسى جوق ازاماتتاردان بولەك، سانتەحنيكاسى ەسكى، توبەسىنەن سۋ اعاتىن، قابىرعالارى دىمقىل جانە تەرەزە جاقتاۋلارى شىرىگەن ۇيلەردە تۇرۋعا ءماجبۇر ازاماتتار سانى دا ايتارلىقتاي كوپ.

مۇنداي جاعدايدا تۇرعىندار ءۇيدى وزدەرى جىلىتۋعا تىرىسادى، بۇل ءورت شىعۋ قاۋپىن ارتتىرادى. تۇركيانىڭ كوپ بولىگى سەيسميكالىق قاۋىپتى ايماقتا ورنالاسقان، سوندىقتان جەر سىلكىنىسى كەزىندە مۇنداي ناشار ۇيلەردىڭ وپىرىلىپ ءتۇسۋ قاۋپى جوعارى. ەسكى ۇيلەردە تۇراتىن ادامدار وسىنداي قاۋىپ-قاتەرگە ۇشىرايدى.

- تۇركيادا ناشار تۇرعىن ءۇي جاعدايىندا ءومىر سۇرەتىن حالىقتىڭ ۇلەسى وتە جوعارى، بۇل ەلدى ەۋروپا ەلدەرى اراسىندا سوڭعى ورىنعا ىعىستىرىپ وتىر، - دەپ اتاپ ءوتتى بۋگرا گەكچە.

ەۋروپالىق ستاتيستيكا اگەنتتىگىنىڭ (Eurostat) مالىمەتى بويىنشا، تۇركياداعى تۇرعىن ءۇي قورىنىڭ ساپاسى ەۋروپاداعى ەڭ ناشار دەڭگەيدە.

سونىمەن قاتار، بۋگرا گەكچە مەملەكەتتىك تۇرعىن ءۇي باعدارلامالارى - TOKİ جانە Emlak Konut-تىڭ قازىرگى ساياساتىن سىنعا الدى. سەبەبى بۇل باعدارلامالار ۇسىناتىن باسپانالار ءۇشىن تولەم شارتتارى تۇركياداعى ەڭ تومەنگى جالاقىدان ءۇش ەسە جوعارى (61698 تۇرىك ليراسى - شامامەن 860000 تەڭگە).

İPA باسشىسىنىڭ ايتۋىنشا، بۇل باعدارلامالار جاعدايى ناشار تۇرعىنداردىڭ ماسەلەسىن شەشپەيدى، كەرىسىنشە، جوعارى تابىسى بار ساتىپ الۋشىلارعا باعىتتالعان.

بۇعان دەيىن ءبىز ەلدىڭ ءىرى مەگاپوليستەرىندە حالىق سانى شامادان تىس ارتىپ جاتقانى، ال كەيبىر ايماقتاردا تۇرعىندار سانى مۇلدەم از ەكەنى تۋرالى جازعان ەدىك.

سونىمەن قاتار، تۇركيانىڭ وڭتۇستىك- شىعىس پروۆينتسيالارىندا ەكى جىل بۇرىن بولعان اپاتتى تابيعي ءزىلزالادان كەيىن تۇرعىن ءۇي-كوممۋنالدىق قورىن قالپىنا كەلتىرۋ جۇمىستارى بەلسەندى تۇردە جۇرگىزىلىپ جاتىر.

اۆتور

نازىم بولەسوۆا