تۇركيا فۋتبولىندا تاعى دا توبەلەس: تورەشى 5 ويىنشىعا قىزىل قاعاز كورسەتتى

فۋتبولدان تۇركيانىڭ ەكىنشى ليگاسىنداعى «بۋرساسپور» جانە «ديارباكىرسپور» اراسىنداعى ماتچتا ويىنشىلار جاعا جىرتىسىپ، 5 بىردەي فۋتبولشى الاڭنان قۋىلدى. جانكۇيەرلەر دە نارازىلىق رەتىندە الاڭعا زاتتار لاقتىرعان.

ويىندا «ديارباكىرسپور» كومانداسى 2:0 ەسەبىمەن ۇتىپ تۇرعان. 82-مينۋتتا ەكى كوماندا ويىنشىلارى اراسىنداعى كەلىسپەۋشىلىك سوڭى توبەلەسكە ۇلاسقان.

كەيىنگى ۋاقىتتا تۇركيا فۋتبولىندا داۋ-جانجال ارتتى. جۋىردا عانا سۋپەرليگاداعى «انكاراگيۋدجيۋ» جانە «ريزەسپور» كوماندالارى اراسىنداعى كەزدەسۋدە كلۋب پرەزيدەنتى باس تورەشىنى سوققىعا جىققان ەدى. بۇل وقيعا قوعامدا ءدۇمپۋ تۋدىرىپ، تۇركيا پرەزيدەنتى رەدجەپ تايىپ ەردوعان مەن FIFA پرەزيدەنتى دجانني ينفانتينو مۇنداي باسسىزدىققا جول بەرىلمەۋى جايلى پىكىر ءبىلدىردى.

بىرەر كۇن بۇرىن تۇركيا سۋپەرليگاسىنداعى «يستانبۋلسپور» مەن «ترابزونسپور» ويىنى دا سوڭىنا دەيىن جەتپەدى. باس تورەشىنىڭ شەشىمىنە نارازى بولعان «ينستانبۋلسپور» كومانداسىنىڭ پرەزيدەنتى كومانداسىن سوڭىنا دەيىن ويناتپاي، الاڭنان الىپ كەتتى. بۇعان قاتىستى تۇركيا فۋتبول فەدەراتسياسى قانداي شەشىم قابىلدايتىنى ازىرگە بەلگىسىز.