تۇركيا بولۋ تراگەدياسىنان كەيىن ازا تۇتۋ كۇنىن جاريالادى

استانا. KAZINFORM - تۇركيا بولۋداعى كارتالكايا تاۋ شاڭعىسى كۋرورتىنداعى ورتكە بايلانىستى اۋىر قايعىنى باستان كەشۋدە. ءورت قۇرباندارىنىڭ كوپ بولۋىنا بايلانىستى 22 - قاڭتار ەلدە جالپى ۇلتتىق ازا تۇتۋ كۇنى بولىپ جاريالاندى.

т
Фото: Anadolu ajansı

ۇكىمەت وتىرىسىنان كەيىن ءسوز سويلەگەن پرەزيدەنت رەجەپ تايىپ ەردوعان قازا تاپقانداردىڭ وتباسىلارىنا كوڭىل ايتىپ، وقيعاعا كىنالىلەردىڭ لايىقتى جازاسىن الاتىنىن ايتتى.

«قايعىلى وقيعاعا قاتىسى بارلار، سونداي-اق ابايسىزدىق پەن قۇقىق بۇزۋشىلىقتارعا كىنالىلەر زاڭ الدىندا جاۋاپ بەرەدى»، - دەگەن ەردوعان ادىلەتتىلىك بارىنشا قاتاڭ تۇردە ارەكەت ەتەتىنىن اتاپ ءوتتى.

ۇلتتىق ازا تۇتۋ بەلگىسى رەتىندە ەلدىڭ تۇكپىر-تۇكپىرىندەگى، سونىڭ ىشىندە تۇركيانىڭ شەتەلدەگى وكىلدىكتەرىندەگى تۋلار تاڭنان كۇن باتقانعا دەيىن جارتىلاي تۇسىرىلەدى. بۇل قايعىلى جاعدايداعى ەل بىرلىگىن بىلدىرەدى.

پرەزيدەنت سونداي-اق وسى قيىن كەزەڭدە ساياسي وقيعالاردى توقتاتۋعا شاقىردى.

- قازىر ساياساتتىڭ ەمەس، بىرلىك پەن قولداۋدىڭ ۋاقىتى. ءبىز بارلىعىن، سونىڭ ىشىندە ساياساتكەرلەردى، بۇقارالىق اقپارات قۇرالدارىن جانە جەرگىلىكتى ۇكىمەتتەردى ازاماتتارىمىزدىڭ قايعىسىن بولىسۋگە شاقىرامىز»، - دەدى ول.

ەردوعان ءتۇرلى سىلتاۋلارمەن مىندەتتەرىنەن جالتارعاندارعا قاتىستى قاتاڭ شارالار قولدانىلاتىنىن باسا ايتتى.

سوڭعى مالىمەتتەر بويىنشا بولۋ پروۆينتسياسىنداعى كارتالكايا تاۋ شاڭعىسى بازاسىندا بولعان ورتتە قازا تاپقاندار سانى 66 ادامعا، جارالانعاندار سانى 51 ادامعا جەتتى.

ءورت عيماراتتى تەز شارپىپ، قوناقتار مەن قىزمەتكەرلەردىڭ ەۆاكۋاتسيالانۋىن قيىنداتقان. قوناق ءۇي ەڭىس ۇستىندە ورنالاسقاندىقتان، ءورتتى تولىق اۋىزدىقتاۋعا جانە عيماراتتىڭ بارلىق جاعىنان ادامداردى ەۆاكۋاتسيالاۋعا مۇمكىندىك بولمادى.

سوڭعى جاڭالىقتار