تۇركيا بۇلدىرشىندەرى بالاباقشادا قازاقتىڭ ۇلتتىق ويىنىن وينايدى
استانا. KAZINFORM - قازاقستان مەن تۇركيا بالاباقشالارىنىڭ وقۋ باعدارلاماسىنا قازاقتىڭ ۇلتتىق ويىنى ەنگىزىلدى.
ق ر وقۋ-اعارتۋ مينيسترلىگى ۇلتتىق عىلىمي-پراكتيكالىق دەنە تاربيەسى ورتالىعىنىڭ مالىمەتىنشە، بۇگىنگى تاڭدا ەلىمىزدىڭ جانە تۇركيانىڭ ءبىرقاتار بالاباقشاسىنىڭ وقۋ باعدارلاماسىنا قازاقتىڭ ۇلتتىق «بەستەمشە» ويىنى ەنگىزىلگەن.
«بەستەمشە» - الەمدىك مادەنيەتتىڭ وزىق ۇلگىلەرىمەن بوي تەڭەستىرە الاتىن، توعىزقۇمالاق ويىنىنىڭ ىقشامدالعان ءتۇرى.
كىشكەنتاي بالالاردىڭ قاۋىپسىزدىگى مەن مۇمكىندىكتەرىن ەسكەرە وتىرىپ جوبالانعان.
«قۇندىلىقتارعا نەگىزدەلگەن ءبىلىم بەرۋ جوباسى اياسىندا «بەستەمشە» ويىنىنىڭ بالاباقشا جاسىنداعى بالالار اراسىندا ويناتىلۋى - بالانى تەك ويىنعا باۋلۋ ەمەس، ۇلتتىق مادەنيەتىمىزبەن تانىستىرۋدىڭ العاشقى قادامدارى. اتالعان ۇلتتىق زياتكەرلىك ويىن ارقىلى بالالاردىڭ لوگيكالىق ويلاۋ قابىلەتى، ساراپتاما جاساۋ، شەشىم قابىلداۋ داعدىلارى قالىپتاسادى، العىرلىعى، زەرەكتىگى دە ارتا تۇسەدى»، - دەيدى بەستەمشە ويىنىنىڭ اۆتورى، ورتالىقتىڭ ترەنەر-لەكتورى، قازاقتىڭ ۇلتتىق بەستەمشە ويىنىن دامىتۋشى، ف. ع. ك. ماقسات شوتايەۆ.
بەستەمشە ويىنى قازىر 2023-2025 -جىلدارعا ارنالعان «مەكتەپكە دەيىنگى ءبىلىم بەرۋ پەداگوگتەرىنىڭ، تاربيەشىلەرى مەن دەنە شىنىقتىرۋ نۇسقاۋشىلارىنىڭ كاسىبي قۇزىرەتتىلىگى مەن داعدىلارىن دامىتۋ» اتتى بىلىكتىلىكتى ارتتىرۋ كۋرسىندا پەداگوگتەرگە وقىتىلىپ جاتىر.
وندا ويىننىڭ ماقساتى، ەرەجەسى جانە شارتتارى ءتۇسىندىرىلىپ، ۇلتتىق سپورتتىڭ ەرەكشەلىگى دارىپتەلۋدە.
