تۇركيا ارمەنياداعى ەسكى اتوم ەلەكتر ستانتسياسىن جابۋدى تالاپ ەتتى

تۇركيانىڭ ۇلى ۇلتتىق جينالىسى وتىرىسىندا ارمەنيادا تۇركيا شەكاراسىنان 16 شاقىرىم قاشىقتىقتا ورنالاسقان مەتسامور ا ە س- ىنە قاتىستى شارا قابىلداۋ تالابى ايتىلدى.

АЭС
Фото: Фото: aa.com.tr

تۇركيا پارلامەنتى ا ە س پايدالانۋ مەرزىمىنىڭ اياقتالۋىنا بايلانىستى تۇتاس ءوڭىر ءۇشىن قاۋىپ توندىرەتىنىن جەتكىزدى، دەپ حابارلايدى قازاقپارات تۇركيانىڭ Anadolu مەملەكەتتىك اقپارات اگەنتتىگىنە سىلتەمە جاساپ.

«اتوم ەلەكتر ستانتسياسىن جابۋ ارمەنيانىڭ ايرىقشا قۇزىرىندا. الايدا، ارمەنيا قۇرامىنا كىرەتىن يادرولىق قاۋىپسىزدىك تۋرالى كونۆەنتسيانىڭ، يادرولىق قاۋىپسىزدىك جونىندەگى كونفەرەنسيانىڭ جانە باسقا دا ءتيىستى الاڭداردىڭ شولۋ كەڭەستەرىندە بۇل اتوم ەلەكتر ستانتسياسىنىڭ تابيعي اپاتتار ءجيى بولاتىن ايماقتا ورنالاسقانى ايتىلۋدا. ا ە س ءبىزدىڭ شەكارامىزعا وتە جاقىن سالىنعان، ەسكى تەحنولوگيا بويىنشا قولدانىلادى. ستانسيا تۇتاس ايماق ءۇشىن قاۋىپ فاكتورى بولىپ وتىر. ءبىزدىڭ ەلىمىز بۇل سىن-قاتەر تۋرالى ماگاتەنىڭ باس كونفەرەنسيالارىندا دا مالىمدەپ ءجۇر جانە حالىقارالىق قوعامداستىققا قاجەتتى ۇندەۋ جولدايدى. ءبىزدىڭ ايماق پەن الەمگە ەكىنشى چەرنوبىل قاجەت ەمەس. مەتسامور اتوم ەلەكتر ستانتسياسى جابىلۋى كەرەك. وسىعان بايلانىستى بۇل ماسەلە ەلىمىزدىڭ نازارىندا بولادى»، - دەيدى تۇركيا سىرتقى ىستەر مينيسترلىگى.

رەسەي، ا ق ش جانە جاپونيا وسى ۋاقىتقا دەيىنگى اتوم ەلەكتر ستانسيالارىنداعى اپاتتار سانى بويىنشا العاشقى ءۇش ورىندى يەلەندى. ا ە س- تە تىركەلگەن 27 اپاتتىڭ بەسەۋى ا ق ش- تا، تورتەۋى رەسەيدە جانە تورتەۋى جاپونيادا بولعان.

قۇرىلىسى 1970-جىلى باستالعان مەتسامور اتوم ەلەكتر ستانتسياسىندا ەكى رەاكتور بار، ولاردىڭ ءبىرى 1976-جىلى، ەكىنشىسى 1980-جىلى پايدالانۋعا بەرىلگەن. ەكى رەاكتور دا 1988-جىلى بولعان سپيتاك جەر سىلكىنىسىنەن كەيىن 1989-جىلى توقتاتىلدى، ءبىراق 2№ رەاكتور 1995-جىلى جوندەۋ جۇمىستارىنان كەيىن قايتا ىسكە قوسىلدى. رەاكتوردىڭ قىزمەت ەتۋ مەرزىمى 2005-جىلى اياقتالدى. 2021-جىلعى تامىزدا جۇرگىزىلگەن جوندەۋ جۇمىستارى ارقىلى پايدالانۋ مەرزىمى 2026-جىلعا دەيىن ۇزارتىلعان.

تۇركيا اتوم ەنەرگياسى جونىندەگى حالىقارالىق اگەنتتىككە بۇرىنعى ك س ر و كەزىندە سالىنعان اتوم ەلەكتر ستانتسياسىنىڭ قىزمەتىن ۋاقىتشا توقتاتۋ تۋرالى ءوتىنىش جاسادى. ەۋروپالىق وداق تا ستانتسيانى جابۋدى تالاپ ەتۋدە، ويتكەنى ول سەيسميكالىق قاۋىپتى ايماقتا ورنالاسقان جانە تەحنولوگيالارى ەسكىرگەن.

سوڭعى جاڭالىقتار