تۇركيا ماڭعىستاۋداعى قايعىلى وقيعاعا بايلانىستى قازاقستانعا كوڭىل ايتتى
استانا. KAZINFORM - تۇركيا كاسپي تەڭىزىندەگى اسكەري وقۋ-جاتتىعۋ كەزىندە اسكەري قىزمەتشىلەردىڭ قازا تابۋىنا بايلانىستى قازاقستانعا كوڭىل ايتتى، دەپ حابارلايدى Kazinform اگەنتتىگىنىڭ انكاراداعى مەنشىكتى ءتىلشىسى.
تۇركيانىڭ بيلىكتەگى ادىلەت جانە دامۋ پارتياسى ءتوراعاسىنىڭ ورىنباسارى، تۇركى مەملەكەتتەرىمەن بايلانىس جونىندەگى جاۋاپتى كۇرشات زورلۋ قازاقستاننىڭ باسىنا تۇسكەن قايعى باۋىرلاس تۇركيا حالقىنىڭ دا ورتاق قايعىسى ەكەنىن ايتتى.
قازاقستاندا جاريالانعان جالپىۇلتتىق ازا تۇتۋ كۇنىنە بايلانىستى ول قازا تاپقانداردىڭ وتباسىلارى مەن ارىپتەستەرىنە، سونداي-اق بارشا قازاق حالقىنا كوڭىل ايتتى.
- قازا بولعانداردىڭ رۋحىنا تىنىشتىق، ارتىندا قالعان تۋعان-تۋىستارى مەن جاقىندارىنا سابىر تىلەيمىن. قايعىلارىڭىزعا ورتاقپىن، - دەلىنگەن ۇندەۋدە.
سونداي-اق قيىن-قىستاۋ كۇندەرى تۇركيا مەن قازاقستان ءبىر-بىرىنە قولداۋ كورسەتىپ، ءوزارا ىنتىماقتاستىعىن ودان ءارى نىعايتا بەرەتىنى اتاپ ءوتىلدى.
ماڭعىستاۋداعى قايعىلى وقيعاعا بايلانىستى شەت مەملەكەتتەردىڭ باسشىلارى مەن حالىقارالىق ۇيىم جەتەكشىلەرىنەن پرەزيدەنت قاسىم-جومارت توقايەۆقا كوڭىل ايتۋ جەدەلحاتتارى ءالى دە كەلىپ جاتىر.
