تۇركيا مەن ا ق ش شاعىن مودۋلدىك رەاكتورلار بويىنشا كەلىسىمگە قول قويدى
استانا. KAZINFORM - تۇركيا مەن ا ق ش شاعىن مودۋلدىك جانە ءتورتىنشى بۋىن رەاكتورلارىن دامىتۋ مۇمكىندىكتەرىن زەرتتەۋگە ارنالعان گرانت ءبولۋ تۋرالى كەلىسىمگە كەلدى، دەپ حابارلايدى Kazinform اگەنتتىگىنىڭ انكاراداعى مەنشىكتى ءتىلشىسى.
تۇركيانىڭ ەنەرگەتيكا جانە تابيعي رەسۋرستار مينيسترلىگىنىڭ مالىمەتىنشە، نيۋ-يوركتە ەلدىڭ مەملەكەتتىك ەنەرگەتيكالىق كومپانياسى TUNAS پەن ا ق ش- تىڭ ساۋدا جانە دامۋ اگەنتتىگى (USTDA) ءتيىستى قۇجاتقا قول قويدى.
تۇركيانىڭ ەنەرگەتيكا جانە تابيعي رەسۋرستار ءمينيسترى الپارسلان بايراكتاردىڭ ايتۋىنشا، جوبا اياسىندا زاماناۋي يادرولىق تەحنولوگيالاردى قولدانۋدىڭ تەحنيكالىق، ەكونوميكالىق جانە قۇقىقتىق مۇمكىندىكتەرى جان-جاقتى زەرتتەلەدى. ونىڭ ىشىندە شاعىن مودۋلدىك رەاكتورلار (SMR) مەن ءتورتىنشى بۋىن رەاكتورلارىنىڭ الەۋەتى باعالانادى.
ءمينيستردىڭ سوزىنشە، بۇل جۇمىستار تۇركيانىڭ ەنەرگەتيكالىق تەڭگەرىمدى ءارتاراپتاندىرۋ جانە ەنەرگەتيكالىق تاۋەلسىزدىگىن كۇشەيتۋ ماقساتىمەن ۇندەس. ەل 2053-جىلعا قاراي كومىرقىشقىل گازى شىعارىندىلارىن بارىنشا ازايتۋدى كوزدەپ وتىر.
- ەلىمىزدىڭ ماقساتى - ەنەرگەتيكالىق تەڭگەرىمدى ءارتاراپتاندىرىپ، ءىرى اتوم ەلەكتر ستانسيالارىمەن قاتار، زاماناۋي ءارى ورنىقتى ەنەرگەتيكالىق ينفراقۇرىلىمدى قالىپتاستىرۋدى جالعاستىرۋ، - دەدى تۇركيا ءمينيسترى.
كەلىسىم اياسىندا تۇركيا ءارتۇرلى تەحنولوگيالىق شەشىمدەردى زەرتتەپ، ەلدىڭ ەنەرگەتيكالىق قاجەتتىلىكتەرىنە بارىنشا ساي كەلەتىن نۇسقالاردى ايقىندايدى.
بۇعان دەيىن تۇركيانىڭ وڭتۇستىگىندە ەلدەگى العاشقى «اككۋيۋ» اتوم ەلەكتر ستانسياسىنىڭ قۇرىلىسى اياقتالۋعا جاقىن ەكەنىن حابارلاعان ەدىك.
