تۇركيا 2054 -جىلعا قاراي كومىرتەك شىعارىندىسىن نولدىك دەڭگەيگە جەتكىزبەك
استانا. KAZINFORM - تۇركيا الداعى 30 جىل ىشىندە كومىرتەك شىعارىندىلارىن نولدىك دەڭگەيگە جەتكىزۋدى كوزدەپ وتىر، دەپ حابارلايدى Kazinform-نىڭ مەنشىكتى ءتىلشىسى.
ەلدىڭ ەنەرگەتيكا جانە تابيعي رەسۋرستار ءمينيسترى الپارسلان بايراكتار ۇكىمەت ەكونوميكانىڭ نەگىزگى سەكتورلارىنا، سونىڭ ىشىندە ەنەرگەتيكا، كولىك، ونەركاسىپ جانە اۋىل شارۋاشىلىعىنا اسەر ەتەتىن كومىرقىشقىل گازىنىڭ شىعارىندىلارىن ازايتۋ بويىنشا كەشەندى شارالار ازىرلەپ، جۇزەگە اسىرۋدى جوسپارلاپ وتىرعانىن اتاپ ءوتتى.
ونىڭ ايتۋىنشا، نولدىك كومىرتەكتى ەكونوميكاعا كوشۋ - بۇل ەكولوگيالىق ماسەلەنى شەشۋ عانا ەمەس، سونىمەن قاتار جاڭا جۇمىس ورىندارىن قۇرۋ جانە ينۆەستيتسيا تارتۋ مۇمكىندىگىن بەرەدى.
«بۇل ماقساتتى جۇزەگە اسىرۋ كليماتتىڭ وزگەرۋىنە قارسى كۇرەستە جانە ەلدىڭ تۇراقتى ەكونوميكاعا كوشۋىندە ماڭىزدى قادام بولماق. ءبىز بولاشاققا وپتيميستىك كوزقاراسپەن قاراپ، وسكەلەڭ ۇرپاقتىڭ تۇراقتى دامۋىن قامتاماسىز ەتۋگە نيەتتىمىز»، - دەدى ا. بايراكتار.
اتاپ ايتقاندا، جاڭارتىلاتىن ەنەرگيانى دامىتۋ، ونەركاسىپ پەن تۇرعىن ءۇي سەكتورىندا ەنەرگيا تۇتىنۋدى ازايتۋ ءۇشىن جاڭا تەحنولوگيالاردى ەنگىزۋ، «جاسىل سۋتەگى» ءوندىرىسىن دامىتۋ جانە كولىكتەگى شىعارىندىلاردى ازايتۋ كوزدەلگەن. ەلدە ەلەكتر كولىكتەردى پايدالانۋدى ىنتالاندىرۋ جانە ەكولوگيالىق تازا قوعامدىق كولىكتى دامىتۋ جوسپارلانۋدا.
العا قويعان ماقساتتارعا جەتۋ ءۇشىن تۇركيا حالىقارالىق ۇيىمدارمەن جانە سەرىكتەستەرمەن ىنتىماقتاستىقتى نىعايتپاقشى. اتاپ ايتقاندا، ەل پاريج كەلىسىمىن جۇزەگە اسىرۋعا باعىتتالعان باستامالارعا قاتىسىپ، ەكولوگيالىق جوبالارعا قارجى تارتۋعا ۇمىتتەنۋدە.
ايتا كەتەيىك، ب ۇ ۇ- نىڭ كليماتتىڭ وزگەرۋى بويىنشا نەگىزدەمەلىك كونۆەنتسياسىنىڭ 29-كونفەرەنسياسى (COP29) اياسىندا باكۋ قالاسىندا وتكەن كليمات جونىندەگى دۇنيەجۇزىلىك سامميتتە تۇركيانىڭ يادرولىق ەنەرگيانى ءۇش ەسەگە ارتتىرۋ باستاماسىنا قول قويىلدى.
