تۇركيا 15 جاسقا تولماعاندارعا الەۋمەتتىك جەلىنى شەكتەمەك
استانا. KAZINFORM - تۇركيادا 15 جاسقا تولماعان بالالارعا الەۋمەتتىك جەلىنى پايدالانۋعا تىيىم سالىنادى، دەپ حابارلايدى Kazinform اگەنتتىگىنىڭ انكاراداعى مەنشىكتى ءتىلشىسى.
ءتيىستى ەرەجە بۇگىن تۇركيانىڭ رەسمي باسىلىمىندا جاريالاندى. قۇجات بويىنشا 15 جاسقا تولماعان بالالارعا الەۋمەتتىك جەلىلەردى پايدالانۋعا تىيىم سالىنادى.
جاس مولشەرى e-Devlet ەلەكتروندى مەملەكەتتىك قىزمەتتەر جۇيەسى ارقىلى بەرىلگەن قۇجات نەگىزىندە تەكسەرىلەدى. ال 15 جاسقا تولماعان بالالاردىڭ اككاۋنت اشۋ تۋرالى وتىنىشتەرى قابىلدانبايدى.
15 جاستان اسقان پايدالانۋشىلاردىڭ اككاۋنتتارى ادەپكىدە جابىق بولادى. ولارعا تىكەلەي ەفير جۇرگىزۋگە جانە جەكەلەندىرىلگەن جارناما كورسەتۋگە تىيىم سالىنادى. سونداي-اق پلاتفورمالاردا جەلىدە وتىرۋ ۋاقىتىن ۇزارتۋعا باعىتتالعان شەكسىز لەنتا قولدانىلمايدى.
بالالارعا وزدەرى جازىلعان اككاۋنتتاردان عانا حابارلاما جىبەرۋگە رۇقسات ەتىلەدى. سونداي-اق ولاردىڭ جازىلۋشىلارى مەن جازىلىمدارى تۋرالى مالىمەتتەر وزگە قولدانۋشىلارعا كورىنبەيدى.
الەۋمەتتىك جەلىلەر اتا-انالارعا بالاسىنىڭ اككاۋنتىن باسقارۋعا، جەلىدە وتكىزەتىن ۋاقىتىن شەكتەۋگە جانە اقىلى قىزمەتتەردى پايدالانۋىنا رۇقسات بەرۋگە ءتيىس.
جاڭا ەرەجەلەر 2026-جىلعى 1-قاراشادان باستاپ كۇشىنە ەنەدى. قولدانىستاعى اككاۋنتتاردىڭ جاسىن تەكسەرۋ 2027-جىلعى 31-ناۋرىزعا دەيىن اياقتالۋعا ءتيىس. ال 15 جاسقا تولماعان بالالاردىڭ اككاۋنتتارى بۇعاتتالادى.
بۇعان دەيىن تۇركيادا الەۋمەتتىك جەلىلەرگە قاتىستى تالاپ كۇشەيىپ جاتقانىن حابارلاعان ەدىك.
