تۇركى مەملەكەتتەرى ءوزارا تاۋار اينالىمىن ارتتىرۋ مۇمكىندىگىن زەردەلەپ جاتىر
تاشكەنت. KAZINFORM - وزبەكستان استاناسىندا تۇركى مەملەكەتتەرى ۇيىمىنا (ت م ۇ) مۇشە ەلدەر تالداۋ ورتالىقتارىنىڭ حالىقارالىق كونفەرەنتسياسى ءوتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
ءىس-شاراعا قازاقستان، تۇركيا، ازەربايجان، قىرعىزستان جانە ماجارستاننان كەلگەن دەلەگاتتار قاتىستى. ولار وڭىرلىك ىنتىماقتاستىق ماسەلەلەرىن تالقىلادى. اتاپ ايتقاندا، ساۋدا-ەكونوميكالىق بايلانىستاردى نىعايتۋ ءۇشىن قولدا بار الەۋەتتى تولىق پايدالانۋ مۇمكىندىكتەرىن زەردەلەدى.
كونفەرەنسيادا ءمالىم بولعانداي، بىلتىر ت م ۇ- عا مۇشە ەلدەردىڭ سىرتقى تاۋار اينالىمى 850 ميلليارد دوللارعا جەتتى، ونىڭ ىشىندە اتالعان كولەمنىڭ %7 ۇيىم مەملەكەتتەرىنىڭ ۇلەسىندە. ساراپشىلار بۇل مەجەمەن شەكتەلىپ قالماۋ كەرەكتىگىن اتاپ ءوتتى. ول ءۇشىن تۇركى ەلدەرى كولىك-لوگيستيكالىق كەدەرگىلەردى جويىپ، ينفراقۇرىلىمدى دامىتىپ، ساۋدا سالاسىنا سيفرلىق تەحنولوگيالاردى ەنگىزۋى ءتيىس.
- تالداۋ ورتالىقتارى اراسىنداعى ءوزارا ءىس-قيمىل تاجىريبەسى ىنتىماقتاستىق باعىتتارىن انىقتاۋعا مۇمكىندىك بەرەدى. تيىسىنشە، ۇيىم شەڭبەرىندە ارىپتەستىكتى دامىتۋ جاڭا ەكونوميكالىق باستامالاردى ىسكە اسىرۋعا نەگىز بولادى، - دەدى وزبەكستاننىڭ ەكونوميكالىق زەرتتەۋلەر جانە رەفورمالار ورتالىعىنىڭ ديرەكتورى وبيد حاكيموۆ.
كونفەرەنسيا قورىتىندىسى بويىنشا تۇركى مەملەكەتتەرى ۇيىمىنا مۇشە ەلدەردىڭ تالداۋ ورتالىقتارى اراسىندا ءوزارا ىنتىماقتاستىق تۋرالى مەموراندۋمعا قول قويىلدى. ءتيىستى قۇجات ينتەگراتسيانى تەرەڭدەتۋگە جانە ءوزارا ساۋدانى ارتتىرۋعا مۇمكىندىك بەرەتىن بىرلەسكەن باستامالاردى زەردەلەۋگە مۇمكىندىك بەرەدى.
ەسكە سالايىق، بيىل وزبەكستان ت م ۇ- عا مۇشە ەلدەرمەن بىرلەسىپ عارىشعا سپۋتنيك ۇشىرماق.
بۇعان قوسا، بىلتىر ت م ۇ- عا مۇشە ەلدەردىڭ وكىلدەرى تاشكەنتتە باس قوسىپ، لوگيستيكالىق جوبالاردى بىرلەسە دامىتاتىن اليانس قۇردى.
