تۇركى ەلدەرىنىڭ ورتاق تاريحى جايلى اكادەميالىق ەڭبەك جازىلادى
انكارا. KAZINFORM - انكارادا تۇركى مەملەكەتتەرى ۇيىمىنا (ت م ۇ) مۇشە ەلدەردىڭ تاريح جانە ارحەولوگيا ينستيتۋتتارى باسشىلارىنىڭ وتىرىسى ءوتتى، دەپ حابارلايدى Kazinform اگەنتتىگىنىڭ ءتىلشىسى.
قاتىسۋشىلار تۇركى ەلدەرىنىڭ ورتاق تاريحى تۋرالى بىرلەسكەن اكادەميالىق ەڭبەكتى جارىققا شىعارۋ ماسەلەسىن تالقىلادى. بۇل باستاما بىلتىر 6-قاراشادا قىرعىزستاندا وتكەن ت م ۇ سامميتىندە كوتەرىلگەن بولاتىن. سول ۋاقىتتا جوبانى ىسكە اسىرۋ تۇركى اكادەمياسىنا جۇكتەلدى.
وتىرىستا ءسوز العان اكادەميا باسشىسى شاين مۋستافايەۆ ورتاق ەڭبەكتى ساپالى ازىرلەۋ كەرەكتىگىن ايتتى.
- ءبىر ەلدىڭ تاريحىن جازىپ شىعۋدىڭ ءوزى وڭاي شارۋا ەمەس. ءبىزدىڭ مىندەتىمىز - باۋىرلاس حالىقتار مەن مەملەكەتتەردىڭ ورتاق تاريحىن جازۋ، - دەدى شاين مۋستافايەۆ.
ول اتاپ وتكەندەي، ازىرلەنەتىن ەڭبەك بارشاعا تۇسىنىكتى ستيلدە جازىلۋى ءتيىس. ويتكەنى، ونى الداعى ۋاقىتتا ستۋدەنتتەر مەن جاس زەرتتەۋشىلەر وزدەرىنىڭ عىلىمي جۇمىستارىنا ارقاۋ ەتەدى.
وتىرىس قورىتىندىسى بويىنشا قاتىسۋشىلار تۇركى ەلدەرىنىڭ تاريحى تۋرالى بىرلەسكەن اكادەميالىق ەڭبەك جازۋ جونىندە حاتتاماعا قول قويدى.
ەسكە سالايىق، بىلتىر ت م ۇ- عا مۇشە ەلدەر لوگيستيكالىق جوبالاردى بىرلەسە دامىتاتىن اليانس قۇردى.
بۇعان دەيىن حابارلاعانىمىزداي، تۇركى مەملەكەتتەرىنىڭ ءوزارا ساۋدا كولەمى 45 ميلليارد دوللاردان استى.
