تۇركى الەمىنىڭ تاريحىن تۇگەندەگەن قوس تومدىق جارىق كوردى

ازىرگە كىتاپتىڭ ءار تومى مىڭ دانامەن قازاق تىلىندە باسىلىپ شىقتى. الداعى ۋاقىتتا باۋىرلاس ەلدەردىڭ تىلدەرىنە اۋدارۋ جوسپارلانىپ وتىر. جوبا اۆتورى دارحان قىدىرالى بۇل ەڭبەكتى بەرىسى ورتالىق ازيادا، ارىسى تۇركى الەمىندە بالاماسى جوق ەنتسيكلوپەديا دەپ باعالادى.

- مەملەكەت باسشىسى قاسىم-جومارت توقايەۆ تۇركى كەڭەسىنىڭ 2021 -جىلعى 31-ناۋرىزدا وتكەن سامميتىندە «تۇركى وركەنيەتىن جاڭعىرتۋدى، ەڭ الدىمەن، ياساۋي مۇراسى مەن قاسيەتتى تۇركىستاندى الەمگە تانىتۋدان باستاۋعا شاقىرامىن» دەپ اتاپ ايتقان ەدى. بۇل ءسوز بىزگە باعدار بولىپ، 2021 -جىلى باستالعان جوبا ناتيجەسىندە 4 مىڭنان استام ماقالا قامتىلعان وسى قوس تومدىق ەنتسليكلوپەديا جارىق كوردى. قولداۋ كورسەتكەن تۇركىستان وبلىسىنىڭ باسشىلىعىنا ريزاشىلىق بىلدىرەمىز، - دەدى ءوز سوزىندە دارحان قىدىرالى.

بۇعان دەيىن تۇركىستاننىڭ ەكى مىڭ جىلدىعىنا وراي ءبىر تومدىق «تۇركىستان» ەنتسيكلوپەدياسى جارىق كورگەن ەدى. سودان بەرى وڭىردە دە، تۇتاس تۇركى الەمىندە دە ەلەۋلى وزگەرىستەر بولدى. سوندىقتان جوبا اۆتورلارى جاڭا باسىلىمعا تۇركىستاننىڭ تۇركى جۇرتىنىڭ رۋحاني ورتالىعىنا اينالۋ جولىن، كەيىنگى جىلدارداعى اۋقىمدى وزگەرىستەر مەن عىلىمي جاڭالىقتاردى ەنگىزۋگە كۇش سالعان.

- ىرگەلى ەڭبەكتىڭ بەزەندىرىلۋىنە ەرەكشە ءمان بەرىلدى. باسىلىمدا تاريحي جانە گەوگرافيالىق كارتالار، تاريحي تۇلعالاردىڭ پورترەتتەرى، مينياتيۋرالار، جاڭعىرتپا سىزبالار، ارحەولوگيالىق جانە ساۋلەت ەسكەرتكىشتەرىنىڭ سۋرەتتەرى، سونداي-اق ارنايى تۇسىرىلگەن ءتۇرلى-ءتۇستى فوتوسۋرەتتەر پايدالانىلدى، - دەدى دەدى جوبا جەتەكشىسى اكادەميك، قوعام جانە مەملەكەت قايراتكەرى دارحان قىدىرالى.

ەكى تومدىق ەڭبەكتىڭ تۇساۋكەسەرى دوڭگەلەك ۇستەل فورماتىندا ءوتتى. جيىنعا تۇركى ەلدەرىنىڭ ەلشىلەرى، عالىمدار مەن زەرتتەۋشىلەر قاتىستى. ولار ورتاق تاريحي مۇرانى زەردەلەۋ مەن تۇركى حالىقتارىنىڭ رۋحاني بايلانىسىن نىعايتۋدىڭ ماڭىزىن اتاپ ءوتتى.

- بۇگىندە ەلدەرىمىز - قازاقستان مەن ازەربايجان اراسىنداعى دوستىق پەن باۋىرلاستىق قارىم- قاتىناستار پرەزيدەنتتەرىمىزدىڭ بەرىك ساياسي ەرىك- جىگەرىنىڭ ارقاسىندا ودان ءارى نىعايىپ كەلەدى. سونىمەن قاتار ەكى ەل دە تۇركى الەمىنىڭ ىقپالداستىعى مەن بىرلىگىنە ەلەۋلى ۇلەس قوسىپ وتىر. بۇگىن تانىستىرىلىپ وتىرعان «تۇركىستان» ەنتسيكلوپەدياسى دا - وسىنداي قولداۋ مەن قامقورلىقتىڭ ناتيجەسى، - دەدى ازەربايجانداعى «تۇركىستان» گازەتىنىڭ باس رەداكتورى اگيل دجامال.

ايتا كەتەيىك، ءىس-شارا بارىسىندا ق ر پرەزيدەنتىنىڭ كەڭەسشىسى مالىك نۇرجان ۇلى وتاربايەۆ مەملەكەت باسشىسىنىڭ اتىنان ەنتسيكلوپەديانى ازىرلەۋگە اتسالىسقان تۇردىقۇل شاڭباي مەن باسىلىمنىڭ جاۋاپتى رەداكتورى جاندوس بادەل ۇلىنا «بارىس» ارنايى بەلگىسىن جانە العىس حات تابىستادى.

ايتا كەتەيىك، بۇگىن رەسپۋبليكا كۇنى قارساڭىندا «كىتاپ وقيتىن ۇلت» جوباسىنىڭ ءانۇرانى تانىستىرىلدى.

اۆتور

ارۋجان ارمان قىزى