تۇركى الەمى ەلدەرىنىڭ نوتارياتتار وداعى قۇرىلدى
بۇگىن انكارادا نوتارياتتىق پالاتالاردىڭ ءتوراعالارى «تۇركى الەمى ەلدەرىنىڭ نوتارياتتار وداعىن» قۇرۋ تۋرالى مەموراندۋمعا قول قويدى، دەپ حابارلايدى قازاقپارات.

قول قويۋ راسىمىنە قازاقستان، تۇركيا، وزبەكستان، ءازىربايجان ادىلەت مينيسترلەرى، قىرعىزستان ادىلەت ءمينيسترىنىڭ ورىنباسارى جانە تۇركى مەملەكەتتەرى ۇيىمىنىڭ (ت م ۇ) باس حاتشىسى قاتىستى.
ق ر ادىلەت ءمينيسترى ازامات ەسقارايەۆ ءوز سوزىندە تۇركى الەمى ەلدەرى اراسىنداعى قۇقىقتىق سالاداعى ىنتىماقتاستىق پەن دامۋدىڭ ماڭىزدىلىعىن اتاپ ءوتتى.
تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋراليەۆ نوتارياتتار وداعىنىڭ قۇرىلۋى ت م ۇ ەلدەرىندەگى تۇراقتىلىقتى نىعايتۋ جانە قۇقىقتار مەن مۇددەلەردى قورعاۋدىڭ ماڭىزدى قۇرالى بولاتىنىن ايتتى.
جيىنعا قاتىسۋشىلار نوتاريات سالاسىنداعى ىنتىماقتاستىق، سونداي-اق ءوزارا ءىس-قيمىلدى ودان ءارى نىعايتۋ جانە زاڭ قىزمەتىن دامىتۋ ماسەلەلەرىن تالقىلادى.
ءىس-شارا اياسىندا ازامات ەسقارايەۆ ءازىربايجاننىڭ ادىلەت ءمينيسترى فيكرەت مامەدوۆ، تۇركيانىڭ ادىلەت ءمينيسترى يىلماز تۋنچ جانە وزبەكستاننىڭ ادىلەت ءمينيسترى اكبار تاشكۋلوۆپەن ەكىجاقتى كەزدەسۋلەر وتكىزدى.
ەسكە سالايىق، تۇركى مەملەكەتتەرى ۇيىمىنا قازاقستان، ءازىربايجان، قىرعىزستان، تۇركيا جانە وزبەكستان ەلدەرى مۇشەلىككە كىرەدى.