تۇرعىندارعا ارنالعان تەگىن سەرۆيس ىسكە قوسىلماق
استانا. KAZINFORM - ونەركاسىپ جانە قۇرىلىس ۆيتسە-ءمينيسترى راحىمجان يساقۇلوۆ قۇرىلتاي دەپۋتاتتارىنىڭ تۇرعىندارعا تەگىن قولجەتىمدى، ونلاين داۋىس بەرۋدىڭ نەگىزگى ءمودۋلى بار تۇرعىن ۇيلەردى باسقارۋعا ارنالعان سيفرلىق سەرۆيستى ىسكە قوسۋ ۇسىنىسىنا جاۋاپ بەردى.
ونىڭ ايتۋىنشا، اتالعان ماسەلە سيفرلاندىرۋ سالاسىنداعى ۋاكىلەتتى ورگانمەن جانە مەملەكەتتىك قىزمەتتەردى تىكەلەي كورسەتەتىن «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق-پەن بىرلەسىپ پىسىقتالدى.
«ازاماتتارعا ارنالعان ۇكىمەت» كورپوراتسياسى ۇسىنعان اقپاراتقا سايكەس، قازىرگى ۋاقىتتا كوندومينيۋم وبەكتىلەرىن باسقارۋ ورگاندارىنىڭ، اتاپ ايتقاندا مۇلىك يەلەرى بىرلەستىكتەرىنىڭ (ميب) قىزمەتىن رەتتەۋگە ارنايى بەيىمدەلگەن بالاما سيفرلىق سەرۆيس قۇرۋ ماسەلەسى قاراستىرىلىپ جاتىر.
- اتالعان سەرۆيستى ازىرلەۋدەگى نەگىزگى ماقسات - ازاماتتاردىڭ دەربەس دەرەكتەرىن بارىنشا سەنىمدى قورعاۋدى قامتاماسىز ەتۋ. دەربەس دەرەكتەردى تىكەلەي بەرۋدى تالاپ ەتەتىن قولدانىستاعى جۇيەلەردەن ايىرماشىلىعى - مەملەكەتتىك كورپوراتسيا دەرەكتەردى حەشتەۋ تەحنولوگياسى ارقىلى مەنشىك قۇقىعىن (جىلجىمايتىن مۇلىكتىڭ بار-جوعىن) راستاۋ تەتىگىن ۇسىنۋ. بۇل مەنشىك يەسىن ونىڭ جەكە مالىمەتتەرىنىڭ تارالىپ كەتۋ قاۋپىنە ۇشىراتپاي سايكەستەندىرۋگە مۇمكىندىك بەرەدى،- دەدى ول.
ۆيتسە-مينيستر قازىرگى ۋاقىتتا اتالعان ارحيتەكتۋرالىق ءتاسىلدىڭ كيبەرقاۋىپسىزدىك تالاپتارىنا سايكەستىگىن راستاۋ ءۇشىن سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ اقپاراتتىق قاۋىپسىزدىك كوميتەتىمەن كەلىسۋ ساتىسىندا تۇرعانىن ايتادى.
- مەملەكەتتىك كورپوراتسيا كەلىسۋ كەزەڭى اياقتالىپ، بىرلەسكەن تەحنيكالىق شەشىم قابىلدانعاننان كەيىن سەرۆيستى 2027-جىلى ىسكە قوسۋعا دايىن ەكەنىن ءبىلدىردى،- دەدى راحىمجان يساقۇلوۆ.
بۇعان دەيىن مۇلىك يەلەرى بىرلەستىگى ءتوراعالارىنىڭ قۇزىرەتىنە قاتىستى ءبىرقاتار ءدال ەمەس ءارى ەكىۇشتى ۇعىمدار انىقتالعانىن، بۇرىنعى ميب ءتوراعاسىنىڭ ەتسق- سىنا تاۋەلدىلىكتەن قالاي ارىلۋعا بولاتىنىن جازعان ەدىك.
سونىمەن قاتار 78 پاتەر يەلەرى كووپەراتيۆى مەن پاتەر يەلەرىنىڭ تۇتىنۋ كووپەراتيۆتەرى قايتا تىركەۋدەن وتە الماعانى بەلگىلى بولعان ەدى.
