ترانسكاسپي ءدالىزى ارقىلى قىتايدان ەۋروپاعا وتەتىن جۇك كولەمى 8 ايدا 84 پايىزعا ارتقان
ترانسكاسپي حالىقارالىق كولىك مارشرۋتى ارقىلى قىتايدان ەۋروپاعا تاسىمالداناتىن جۇك كولەمى 8 ايدىڭ ىشىندە 84 پايىزعا وسكەن، دەپ حابارلايدى قازاقپارات ءتىلشىسى.

بۇل تۋرالى كولىك ءمينيسترى مارات قارابايەۆ «New Silk Way» حالىقارالىق كولىك-لوگيستيكالىق بيزنەس-فورۋمىنىڭ اشىلۋىندا ايتتى.
ۆەودمستۆو باسشىسى ترانسكاسپي ءدالىزىنىڭ ماڭىزى ارتقاندىقتان، قازاقستان ونىڭ بويىنداعى وزىنە قاراستى نىسانداردىڭ قۋاتىن ارتتىرۋعا كوشكەنىن ءمالىم ەتتى.
«قازاقستاننىڭ ليانيۋنگان پورتىندا ورنى بار. قازىر سيان قالاسىندا جاڭا قۇرعاق پورت سالىپ جاتىرمىز. جۇك وسى ەكى نۇكتەدە جينالادى. ودان ءارى قورعاس قۇرعاق پورتى بار. ول جەردە قىتايدىڭ دا ۇلەسى بار. مارشرۋت قورعاستان اقتاۋ باعىتىنا كەتەدى. ول جاقتا جالپى جيىنتىق قۋاتى 20 ميلليون توننا جۇك قابىلداۋعا قاۋقارلى ەكى پورت بار - اقتاۋ جانە قۇرىق پورتتارى. ودان وتكەن جۇك كاسپي تەڭىزىنە ءوتىپ، ازەربايجان مەن گرۋزيا ارقىلى ەۋروپاعا جەتەدى. ترانسكاسپي حالىقارالىق كولىك مارشرۋتى قازىر ماڭىزدى دالىزگە اينالىپ كەلەدى. بۇل ءدالىز ارقىلى وتەتىن جۇكتىڭ كولەمىنە قاراساڭىز سونى تۇسىنەسىز. 2021-جىل مەن 2022-جىلدىڭ قورىتىندىسىن سالىستىرساق، ءدالىزدى پايدالانۋ كورسەتكىشى ەكى ەسە ارتقان»، - دەدى ول.
مارات قارابايەۆتىڭ مالىمەتى بويىنشا، جىل باسىنان ءدالىز ارقىلى تاسىمالدانعان جۇكتىڭ كورسەتكىشى 2022-جىلدىڭ كورسەتكىشىنەن 84 پايىز اسىپ كەتكەن.
«ءسوز جوق، بۇل مارشرۋتتى دامىتۋدا ازەربايجان مەن گرۋزياداعى سالالىق مينيسترلىكتەرمەن ۇيلەسىمدى جۇمىس ماڭىزدى ءرول اتقارادى. سوندىقتان بىلتىر كەدەرگىلەردى جويۋعا باعىتتالعان ءتيىستى جول كارتاسىنا قول قويىلدى.
جالپى ترانسكاسپي ءدالىزىن دامىتىپ، قازاقستاننىڭ مۋلتيمودالدىك (ءبىر كەلىسىمشارت نەگىزىندە جۇكتى سۋ، اۋە، قۇرلىق جولدارى سياقتى ءتۇرلى تاسىلمەن دىتتەگەن جەرگە جەتكىزۋ - رەد) تاسىمال قۋاتىن كەڭەيتۋ باعىتىندا بىرنەشە ينفراقۇرىلىمدىق جوبا قولعا الىنعان.
بىلتىر دوستىق-مويىنتى ۋچاسكەسىندە ەكىنشى جولدىڭ قۇرىلىسى باستالدى. بۇل جۇك وتكىزۋ قابىلەتىن 5 ەسە، تاسىمال جىلدامدىعىن 1500 شاقىرىمعا دەيىن كوبەيتەدى.
داربازا-ماقتارال اينالما تەمىرجول جەلىسىنىڭ قۇرىلىسى باستالىپ جاتىر. باقتى-اياگوز باعىتىندا ءبىر جاڭا جوبا بار. بىزدە قازىر ەكى ءىرى تەمىرجول وتكىزۋ بەكەتى بار. جۇك اينالىمىنىڭ جيىنتىق قۋاتى 28 ميلليون تونناعا شاقتالعان. بيىل ونداعى جۇك اينالىمى 27 ميلليون تونناعا جەتەتىن ءتۇرى بار. ياعني، قازىر قىتايدان كەلگەن جۇكتى قابىلدايتىن ءۇشىنشى بەكەت اشۋ وتە ماڭىزدى بولىپ تۇر. وسى تۇرعىدان العاندا باقتى-تاچەن باعىتىندا سالىنىپ جاتقان، جۇك اينالىمى 20 ميلليون توننالىق جاڭا تەمىرجول بەكەتى ەڭ وزەكتى نىسان بولىپ وتىر.
قۇرىق، اقتاۋ پورتتارىنىڭ قۋاتىن دا ارتتىرۋ قاجەت. باقتى-تاچەن باعىتىنداعى جاڭا تەمىرجول وتكىزۋ بەكەتىندە جاڭا قۇرعاق تەرمينال سالۋ كەرەك. ونىمەن قويماي، قازىر قولدانىستاعى تەمىرجول وتكىزۋ بەكەتتەرىنىڭ قۋاتىن ارتتىرۋ كوزدەلىپ وتىر. ترانسكاسپي حالىقارالىق كولىك مارشرۋتىن دامىتۋ اياسىندا وسىنداي جوبالار ىسكە اسادى»، - دەدى مينيستر.