تەگەراندا رايسيدى جەرلەۋ ءراسىمى باستالدى
استانا. KAZINFORM - سارسەنبى كۇنى يران استاناسىندا يران پرەزيدەنتى يبراحيم رايسي، سىرتقى ىستەر ءمينيسترى حوسەين امير-ابدوللاحيان جانە تىكۇشاق اپاتىنان قازا بولعانداردى جەرلەۋ ءراسىمى باستالدى.
نەگىزگى جەرلەۋ ءراسىمى بۇگىن تاڭەرتەڭ تەگەران ۋنيۆەرسيتەتىنىڭ جانىندا باستالدى. يراننىڭ رۋحاني كوسەمى، 85 جاستاعى اياتوللا الي حامەنەي تەگەران ۋنيۆەرسيتەتىندە مارقۇم پرەزيدەنت رايسيدىڭ جانازاسىن شىعارىپ، جەكسەنبى كۇنگى اپاتتا قازا تاپقان رايسي مەن باسقا دا يراندىق شەنەۋنىكتەرگە دۇعا وقىدى. جانازاعا يران پرەزيدەنتىنىڭ مىندەتىن اتقارۋشى مۇحاممەد موحبەر جانە باسقا دا رەسمي تۇلعالار قاتىستى.
مارقۇمداردىڭ تابىتتارىنا يران تۋى تىگىلگەن، ال رايسيدىڭ تابىتىندا ونىڭ مۇحاممەد پايعامباردان تىكەلەي شىققانىن بىلدىرەتىن قارا تاقيا بار. تەگەران ۋنيۆەرسيتەتى مەن ونىڭ ماڭايىندا كوپتەگەن ادام رايسيدىڭ سۋرەتتەرىن ۇستادى. الاڭنىڭ اينالاسىنان مارقۇم پرەزيدەنتتى ماداقتاعان ترانسپارانتتاردى كورۋگە بولادى.
شەتەلدىك جوعارى لاۋازىمدى تۇلعالار قاتىساتىن شەرۋلەر ۋنيۆەرسيتەت جانىنان باستالىپ، ورتالىق ەنگەلاب (ريەۆوليۋتسيا) الاڭىنا قاراي بەت الدى. شەرۋ ودان كەيىن ەنگەلاب الاڭىنان تابىتتاردى پرەزيدەنت رايسي وتكەندە ءسوز سويلەگەن شامامەن 5 شاقىرىم جەردە ورنالاسقان بوستاندىق الاڭىنا اپارادى.
جەرلەۋ راسىمىنە يراننىڭ اسكەريلەندىرىلگەن يسلام ريەۆوليۋتسياسى ساقشىلار كورپۋسىنىڭ جوعارى لاۋازىمدى جەتەكشىلەرى، سونداي-اق حاماس باسشىسى يسمايل حانيا دە قاتىسۋدا.
«مەن پالەستينا حالقى اتىنان، گازاداعى قارسىلاسۋ توپتارى اتىنان كوڭىل ايتۋ ءۇشىن كەلدىم»، - دەدى حانيا جينالعاندارعا.
حانيا سونىمەن بىرگە رامازان ايىندا رايسيمەن تەگەراندا كەزدەسكەنىن، سول كەزدە پرەزيدەنتتىڭ پالەستينا ماسەلەسى مۇسىلمان الەمىندەگى وزەكتى بولىپ قالاتىنىن ايتقانىن بايانداپ بەردى.
رايسيدى جەرلەۋ راسىمىنە تۇركيا سىرتقى ىستەر ءمينيسترى حاكان فيدان، يراك پرەمەر- ءمينيسترى مۇحاممەد شيا اس- سۋداني، پاكىستان پرەمەر-ءمينيسترى شەحباز شاريف، ءۇندىستان ۆيتسە-پرەزيدەنتى دجاگديپ دحانحار، رەسەي مەملەكەتتىك دۋماسىنىڭ سپيكەرى ۆياچەسلاۆ ۆولودين، اۋعانستاننان كەلگەن تاليبان وكىلدەرى، سونىڭ ىشىندە سىرتقى ىستەر ءمينيسترى امير حان مۋتاككي بار.
يراننىڭ بۇكىل ايماقتاعى وداقتاستارىنان، سونىڭ ىشىندە سيريا مەن ليۆانداعى «حەزبوللا» توبىنان دا كوڭىل ايتۋ حابارلامالارى كەلدى.
ءبىر كۇن بۇرىن ۇشاق اپاتى بولعان يراننىڭ شىعىس ازەربايجان پروۆينتسياسىنىڭ اكىمشىلىك ورتالىعى تەبريز قالاسىندا جەرلەۋ ءراسىمى ءوتتى. ازاتتىق الاڭىنىڭ اينالاسىنداعى كوشەلەر قورشاۋعا الىنىپ، قاۋىپسىزدىك شارالارى كۇشەيتىلگەنى حابارلانعان، ويتكەنى وندا مىڭداعان ازا تۇتۋشى جينالۋدا.
رايسيدى ەسكە الۋ راسىمىنە ساعات 16:00 (استانا ۋاقىتىمەن 17:30) شاماسىندا شەتەلدىك جوعارى وكىلەتتى تۇلعالار قاتىسادى دەپ كۇتىلۋدە. كەشكە رايسيدىڭ سۇيەگى جەرلەۋ ءۇشىن تۋعان قالاسى مەشحەدكە جەتكىزىلەدى.
جەرلەۋ راسىمىنە قازاقستاننان ءماجىلىس سپيكەرى ەرلان قوشانوۆ قاتىسادى. مۇنداي بۇيرىقتى مەملەكەت باسشىسى قاسىم-جومارت توقايەۆ بەردى. يران پرەزيدەنتىنىڭ جەرلەۋ ءراسىمى 23-مامىر كۇنى كەشكە مەشحەدتەگى يمام رەزا كەسەنەسىندە وتەدى. وندا سىرتقى ىستەر ءمينيسترى حوسەين امير ابدوللاحيان، شىعىس ازەربايجان پروۆينتسياسىنىڭ گۋبەرناتورى ماليك راحمەتي جانە اياتوللا تەبريز الي حاشيم دە جەرلەنەدى.
