تۇران جولبارىسىن قايتا جەرسىندىرۋ ءۇشىن بالقاش جاعالاۋىنا 60 قۇلان جىبەرىلدى
سامارقان. KAZINFORM - تۇران جولبارىسى قازاقستانعا 2026 -جىلعا قاراي ورالۋى مۇمكىن. بۇل تۋرالى سامارقاندتا ءوتىپ جاتقان جابايى جانۋار تۇرلەرىن ساقتاۋ كونۆەنتسياسىنىڭ كەزەكتى وتىرىسى (COP 14) اياسىندا ب ۇ ۇ دامۋ باعدارلاماسىنىڭ جانۋارلار دۇنيەسىن باسقارۋ جونىندەگى ساراپشىسى ايمان وماربەكوۆا ءمالىم ەتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
«تۇران جولبارىسىن قايتا جەرسىندىرۋ بويىنشا قازاقستاندا اۋقىمدى ىستەر قولعا الىندى. ماسەلەن، ەل ۇكىمەتى وسى جىرتقىشقا ارنالعان ەكوجۇيەنى قالىپتاستىرۋ ءۇشىن ب ۇ ۇ دامۋ باعدارلاماسىمەن گرانتتىق كەلىسىم جاسادى. ونىڭ اياسىندا تۇران جولبارىسىنىڭ قورەكتىك بازاسىن قۇرۋ باستالدى. بۇگىنگە دەيىن التىنەمەل ۇلتتىق پاركىنەن ىلە-بالقاش رەزەرۆاتىنا 60 قۇلان اكەلىندى. سونىمەن قاتار، قارا باقاناس ارناسىن تازارتۋ بويىنشا جوبالىق قۇجاتتاما ازىرلەندى. ونىڭ ناتيجەسىندە تۇران جولبارىسىنا قاجەتتى كولەمدە سۋ بولادى دەپ جوسپارلانعان»، - دەدى ايمان وماربەكوۆا Kazinform ءتىلشىسىنىڭ ساۋالىنا جاۋاپ بەرە وتىرىپ.
ونىڭ اتاپ وتۋىنشە، قازاقستان ۇكىمەتى دۇنيە جۇزىلىك جابايى تابيعات قورىمەن كەلىسىمگە قول قويعان.
سوعان سايكەس، اتالعان ۇيىم ءوز قاراجاتى ەسەبىنەن التىنەمەل ۇلتتىق پاركىنە بۇقار بۇعىسىن اكەلدى.
«بۇقار بۇعىسى تۇران جولبارىسىنىڭ قورەگى ءۇشىن قولدانىلادى. جالپى ونىڭ ەكوجۇيەگە دە پايداسى از ەمەس. بۇل باستامانى ىسكە اسىرۋ ءۇشىن اۋەلى قازاقستانعا امۋر جولبارىسىن اكەلۋ جوسپارلانعان. ول ءتۇرى جاعىنان تۇران جولبارىسىنا ەڭ ۇقساس اڭ سانالادى جانە بۇرىندارى سىرداريا مەن ىلە وزەنىنىڭ جاعالاۋىن مەكەندەگەن. ولاردى 2026 -جىلعا قاراي اكەلۋ كوزدەلىپ وتىر. ازىرگە بۇل ماسەلە پىسىقتالىپ جاتىر. العاشىندا تەك 2-3 باس قانا الىپ كەلىنۋى مۇمكىن»، - دەپ تۇيىندەدى ايمان وماربەكوۆا.
ەسكە سالايىق، بۇعان دەيىن ب ۇ ۇ تۇران جولبارىسىنىڭ پوپۋلياتسياسىن قالپىنا كەلتىرۋگە اتسالىساتىنىن جازىپ ەدىك.
قوسا كەتسەك، بۇل كۇندەرى سامارقان قالاسىندا ۇنەمى قونىس اۋداراتىن جابايى جانۋار تۇرلەرىن ساقتاۋ كونۆەنسياسىنىڭ كەزەكتى وتىرىسى ءوتىپ جاتىر.
شارا اياسىندا قازاقستان، وزبەكستان جانە قىرعىزستان ەلدەرى افريكا مەن ەۋرازيا اۋماقتارىندا ۇنەمى قونىس اۋدارىپ مەكەن ەتەتىن جىرتقىش قۇستاردى ساقتاۋ جونىندەگى حالىقارالىق مەموراندۋمعا قوسىلدى.
اۆتور
ءاليحان اسقار
