ترامپتىڭ يناۋگۋراتسياسىنا دايىندىق قىزىپ جاتىر
استانا. KAZINFORM - دونالد ترامپقا جاقىندا جاسالعان قاستاندىق ارەكەتىن جانە ۇلىقتاۋ راسىمىنە كوپ قوناق كەلەتىنىن ەسكەرگەن ا ق ش شەنەۋنىكتەرى ءتارتىپتى قامتاماسىز ەتۋ ءۇشىن كۇش سالىپ جاتىر.

CBN حابارلاۋىنشا، ۆاشينگتوندا كاپيتوليدەن اقۇيگە دەيىن ەكى ميلدىك قاۋىپسىزدىك ايماعىن قۇرۋ ءۇشىن كولىك قۇرالدارىنا قورعان ورناتىلىپ، قاتاڭ قاۋىپسىزدىك شارالارى ەنگىزىلدى.
ۇلىقتاۋ ءراسىمىنىڭ قاۋىپسىزدىگىن جانە سالتاناتتى شاراعا قاتىسقانداردى قورعاۋدى قامتاماسىز ەتۋ ءۇشىن 25000 عا جۋىق قۇقىق قورعاۋ ورگاندارىنىڭ قىزمەتكەرلەرى ەلدىڭ تۇكپىر-تۇكپىرىنەن كەلىپ جاتىر.
- پرەزيدەنتتى ۇلىقتاۋ ءراسىمى كەزىندە بۇكىل پوليتسيا بولىمشەسى جۇمىلدىرىلادى. بۇعان قوسا، بىزگە ا ق ش- تىڭ تۇكپىر-تۇكپىرىندەگى وفيتسەرلەر ءوز ەركىمەن ەل استاناسىنداعى پوليتسيا دەپارتامەنتىنە كومەكتەسەتىن بولادى، - دەدى ەل استاناسىنداعى پوليتسيا دەپارتامەنتىنىڭ باستىعى پامەلا سميت.
ترامپ ناۋقانى كەزىندەگى سوڭعى وقيعالار، سونىڭ ىشىندە ەكى قاستاندىق ارەكەتى (پەنسيلۆانيا مەن فلوريدادا) قاۋىپسىزدىك ماسەلەلەرىن كۇشەيتتى. 15 ادامنىڭ ءومىرىن قيعان جاڭا ورلەانداعى جۇك كولىگىن ادامداردى ايداپ سالۋ ءۇشىن پايدالانۋ جانە لاس-ۆەگاستاعى ترامپ قوناق ءۇيىنىڭ جانىندا Tesla Cybertruck كولىگىنىڭ جارىلۋى دا قاۋىپسىزدىكتى كۇشەيتۋگە سەبەپ بولدى.
قۇپيا قىزمەت اۋەدەن باقىلاۋ ءۇشىن درون پايدالانادى، ال فەدەرالدى اۆياتسيا اكىمشىلىگى ۆاشينگتون قالاسىنىڭ ورتالىعىنداعى ۇشۋلارعا ۋاقىتشا شەكتەۋ جاريالادى.
ۇلتتىق گۆارديا اسكەرى مەن باسقا شتاتتاردىڭ وفيتسەرلەرى كەلۋشىلەردى تەكسەرۋ ءۇشىن باقىلاۋ-وتكىزۋ پۋنكتتەرىندە جۇمىس ىستەيدى. ف ب ر سونىمەن قاتار قاۋىپتى تالداۋ مەن تەرگەۋدى ۇيلەستىرۋ ءۇشىن ەكى كوماندالىق پۋنكت قۇرۋ ارقىلى قوسىمشا ساقتىق شارالارىن قابىلدايدى.
شەنەۋنىكتەر ناقتى قاۋىپ-قاتەردىڭ جوقتىعىن ايتقانىمەن، قاۋىپسىزدىك ساراپشىلارى يناۋگۋراتسيانى نىساناعا العان ەكسترەميستىك توپتاردىڭ ىقتيمال زورلىق-زومبىلىعىنا الاڭداۋلى.
قۇقىق قورعاۋ ورگاندارى دا نارازىلىق اكسيالارىنا دايىندىق جاسادى.
ا ق ش- تىڭ جاڭادان سايلانعان پرەزيدەنتى دونالد ترامپتىڭ يناۋگۋراتسيادا سويلەيتىن ءسوزى دۇيسەنبى كۇنگە بولجانعان ايازعا بايلانىستى عيمارات ىشىنە اۋىستىرىلادى، دەپ حابارلايدى NPR.
ادەتتە كاپيتوليدىڭ باتىس جاعىنداعى ۇلتتىق ساۋدا ورتالىعىنا قاراما-قارسى وتەتىن يناۋگۋراتسيا كاپيتولي روتوندۋ ىشىنە كوشىرىلدى. 1985-جىلعى رونالد رەيگاننىڭ ەكىنشى ۇلىقتاۋ ءراسىمى دە كاپيتوليدىڭ ىشىنە كوشىرىلگەن. دۇيسەنبى كۇنگى يناۋگۋراتسيا سودان بەرگى ەكىنشى كاپيتولي ىشىندە وتەتىن ءراسىم بولۋى مۇمكىن.
ۇلتتىق اۋا رايى قىزمەتىنىڭ مالىمەتىنشە، دۇيسەنبىدە ۆاشينگتوندا تەمپەراتۋرا فارەنگەيت بويىنشا 23 گرادۋسقا دەيىن (مينۋس 5 گرادۋس) سۋىق بولادى.
ايتا كەتەيىك، وسىعان دەيىن شي جينپيڭ ترامپپەن تەلەفون ارقىلى سويلەسكەنىن جازعان بولاتىنبىز.