ترامپتىڭ ساۋدا ساياساتى قايتا جانداندى: ا ق ش سوتى تاريفتەردى قولدادى
استانا. KAZINFORM - ا ق ش- تىڭ فەدەرالدى اپەللياتسيالىق سوتى پرەزيدەنت دونالد ترامپتىڭ شەتەلدىك يمپورتقا ەنگىزگەن كەدەندىك باج سالىعىن قايتا قالپىنا كەلتىردى. بۇل سالىق بۇعان دەيىن حالىقارالىق ساۋدا جونىندەگى سوت شەشىمىمەن زاڭسىز دەپ تانىلىپ، توقتاتىلعان بولاتىن، دەپ جازدى Euronews سايتى.
سوت ەكى تاراپقا دا جازباشا دالەلدەر ۇسىنۋدى تاپسىردى: تالاپكەرلەر - 5 - ماۋسىمعا دەيىن، ترامپ اكىمشىلىگى - 9 - ماۋسىمعا دەيىن. بۇعان دەيىن سوت پرەزيدەنتتىڭ ءوز وكىلەتتىگىن اسىرا پايدالانىپ، كونگرەسس قۇزىرىنداعى ساۋدا ساياساتىنا ارالاسقانىن ايتقان.
ا ق ش- تىڭ حالىقارالىق ساۋدا فەدەرالدىق سوتى امەريكاندىق پرەزيدەنت ءوز وكىلەتتىكتەرىن شەكتەن تىس اسىردى ءارى الەمنىڭ كوپتەگەن ەلدەرىندەگى باج سالىعى زاڭسىز دەپ تاۋىپ، جاڭا تاريفتەردىڭ كوپشىلىگىنە توسقاۋىل قويدى.
ونىڭ ۇكىمىنە سايكەس، دونالد ترامپ سانكسيالاردى ۇلعايتۋ كەزىندە كەلتىرگەن «حالىقارالىق توتەنشە ەكونوميكالىق وكىلەتتىكتەر تۋرالى» زاڭ مەملەكەت باسشىسىنا تاريفتەر ەنگىزۋگە مۇمكىندىك بەرمەيدى، ويتكەنى كونستيتۋتسياعا سايكەس، باسقا ەلدەرمەن ساۋدانى رەتتەۋگە پرەزيدەنت ەمەس، كونگرەسس ايرىقشا وكىلەتتىككە يە.
تالاپ ارىز Liberty Justice Center اتتى كوممەرتسيالىق ەمەس زاڭ ۇيىمى ارقىلى، باج سالىعى اسەر ەتكەن شاعىن بيزنەس يەلەرىنىڭ اتىنان بەرىلدى. ترامپ اكىمشىلىگى سوت شەشىمىنە بىردەن شاعىم ءتۇسىردى.
بۇعان دەيىن حابارلانعانداي، ترامپ ە و تاريفتەرىن 9- شىلدەگە دەيىن شەگەردى.
