ترامپتىڭ قىلمىستىق ءىسى بويىنشا سوتتاعى العاشقى جەتى القابي تاڭدالدى
استانا. KAZINFORM - العاشقى جەتى ادام بۇرىنعى پرەزيدەنت دونالد ترامپتىڭ سوتىندا ءادىل ءارى بەيتاراپ ۇكىم شىعارا الاتىندارىنا سەندىرگەننەن كەيىن قازىلار القاسىنىڭ قۇرامىنا سايلاندى، دەپ حابارلايدى NBC News.
ا ق ش- تىڭ القابيلەر سوتى 12 ادامنان تۇرادى. 96 ۇمىتكەردىڭ ىشىنەن تاڭدالعان العاشقى جەتى ادام انت بەردى جانە دۇيسەنبىدە سەگىز اپتاعا سوزىلاتىن سوت پروتسەسىن باستايدى.
قازىلار القاسى تۋرالى كەلەسى مالىمەت بار:
ءبىرىنشى القابي: باتىس گارلەمدە (نيۋ- يورك اۋدانى) تۇرادى، ساتۋ سالاسىندا جۇمىس ىستەيتىن ادام. ول ۇيلەنگەن جانە «كەز كەلگەن نارسەنى تازا اۋادا» ىستەگەندى ۇناتادى.
ەكىنشى القابي: جوعارعى يست-سايدتا (نيۋ-يورك قالاسى) تۇراتىن ايەل، «Memorial Sloan Kettering»- تە ونكولوگيالىق مەدبيكە بولىپ جۇمىس ىستەيدى. ونىڭ ءسوز بايلاسقان جۇبى بار. ول بوس ۋاقىتىن وتباسىمەن سونداي-اق دوستارىمەن وتكىزگەندى ۇناتادى. ساياباقتا يتىمەن سەرۋەندەگەندى جانى سۇيەدى.
ءۇشىنشى القابي چەلسيدە (نيۋ- يورك قالاسى) تۇراتىن جاس جىگىت، كورپوراتيۆتى قۇقىق زاڭگەرى بولىپ جۇمىس ىستەيدى. جاياۋ ءجۇرۋدى جانە جۇگىرۋدى جاقسى كورەدى.
ءتورتىنشى القابي تومەنگى يست-سايدتا تۇراتىن ورتا جاستاعى ەر ادام، IT بويىنشا وقىتۋ جانە كەڭەس بەرۋمەن اينالىسادى. ۇيلەنگەن، ءبىر بالاسى مەن ەكى نەمەرەسى بار.
بەسىنشى القابي گارلەمدە تۇرادى. مۇعالىم بولىپ جۇمىس ىستەيتىن جاس ايەل. ول جىگىتىمەن تۇرادى. تەاترعا بارعاندى جانە ساحاتتاعاندى ۇناتادى.
التىنشى القابي چەلسيدە تۇراتىن جاس ايەل. ماماندىعى - ينجەنەر- پروگرامميست.
جەتىنشى القابي جوعارعى يست-سايدتا تۇراتىن ەر ادام، ازاماتتىق ادۆوكات بولىپ جۇمىس ىستەيدى. ول تابيعات اياسىندا ۋاقىت وتكىزگەندى ۇناتادى.
نيۋ- يوركتە دونالد ترامپقا قاتىستى قىلمىستىق پروتسەسس دۇيسەنبى كۇنى باستالدى. بۇل بۇرىنعى پرەزيدەنتتىڭ قىلمىستىق ءىس بويىنشا سوتقا العاش رەت تارتىلۋى.
