ترامپتىڭ ميگراتسيالىق ساياساتى قازاقستانعا قالاي اسەر ەتەدى
استانا. KAZINFORM - ا ق ش- تاعى جاڭا ميگراتسيالىق ساياساتتىڭ جاڭعىرىعى قازاقستانعا جەتە مە؟ ساراپشىلار تىكەلەي بولماسا دا جاناما اسەر ەتەرى ءسوزسىز ەكەنىن ايتادى.

حالىقارالىق ساياساتتانۋشى جانات مومىنقۇلوۆ ترامپتىڭ بۇل ۇستانىمى ءبىرىنشى كەزەكتە مەكسيكا مەن كاناداعا باعىتتالعانىنا توقتالدى.
- سەبەبى، ەكى ەل شەكاراسى قازىر امەريكا ءۇشىن ۇلكەن شىرعالاڭعا اينالدى. ەسىرتكى تاسىمالى، قىلمىستىق توپتار تۇرعىسىنان قاۋىپ جوعارى. مەكسيكادان وتە الماعاندار كانادانى پايدالانادى. بىلتىر ا ق ش مەكسيكادان جارتى ميلليون ادامدى كىرگىزبەي قويعان. يسپان ءتىلدى لاتىن امەريكاسى مەن مەكسيكا حالقىنىڭ سانى جىلدام ءوسىپ جاتىر. ءبىراق، جەرگىلىكتى ۇكىمەتتەر ولاردىڭ الەۋمەتتىك جاعدايىن جاقسارتا الماي وتىر. سوندىقتان جايلى تۇرمىس ىزدەگەن تۇرعىندار شەكارا اسۋعا ءماجبۇر. بۇل - زور داعدارىس، - دەيدى ساراپشى.
پايىمداۋىنشا، امەريكاعا ءوز بەتىنشە بارۋ شەكتەلىپ، ءتىپتى وقۋ بويىنشا تالاپتار كۇشەيتىلۋى مۇمكىن. تەك ۇكىمەتارالىق ارنالار جۇمىس ىستەي بەرەدى. ساياسي پانا سۇراۋ جاعى قيىندايدى.
امەريكا جىل سايىن 10 ميلليون جۋىق ەميگرانتپەن دەموگرافياسىن كوتەرىپ وتىر. دەمەك، دەموگرافيالىق تۇرعىدان جاقسارعان ەل ەندى ىشكى قاۋىپسىزدىككە باسا كوڭىل اۋدارادى.
دونالد ترامپ ىشكى الەۋمەتتىك ءارى ەكونوميكالىق ءوسىم ءۇشىن جۇمىس ىستەيتىنىن مالىمدەدى. وسى رەتتە جانات مومىنقۇلوۆ Green card نەمەسە ءبىلىم الۋ بويىنشا باراتىندار ءۇشىن ۇلكەن كەدەرگى تۋىنداماعانمەن شەكتەۋ بولاتىنىن جەتكىزدى.
- ناقتى ايتۋ قيىن ارينە، ازىرگە. ءبىراق، شەكتەۋ بولادى. ترامپتىڭ كەزىندە امەريكاعا كوشۋ ميگراتسيا ماقساتىندا قيىندايدى. ورتالىق ازيادان جىل سايىن وزبەكستاننان 2 جارىم ميلليون ادام Green card-قا قاتىسادى ەكەن. بىلتىر ازايعان، بيىل دا ازايىپتى. ءبىراق، بۇل تەك ترامپتىڭ كەزىندە بولادى. ودان كەيىن دەموكراتيالىق ۇكىمەت كەلسە، شەكتەۋلەر قايتا قالىپقا كەلۋى مۇمكىن، - دەدى ول.
ساياسات تانۋشى جانەركە قايرات قىزى دا ارىپتەسىنىڭ پىكىرىن قۇپتايدى. راسىمەن دە كەي كەدەرگىلەر تۋىنداۋى مۇمكىن. ا ق ش- تىڭ ميگراتسيالىق ساياساتى - وتە اقىلدى ادامداردى جيناۋعا باعىتتالعان.
- وتە بەلسەندى، ءبىلىمدى ازاماتتار ءوز جولىن تابادى. باعدارلاما كوپ. رەسپۋبليكالىقتار نەگىزىنەن ەكونوميكالىق جانە اسكەري باعىتقا باسىمدىق بەرسە، دەموكراتتار جۇمساق كۇشكە كوڭىل ءبولدى. سوندىقتان ءبىلىم سالاسىنداعى ءتۇرلى باعدارلامالار ترامپتىڭ كەلۋىمەن تىيىلادى دەگەن جوسپار بار. ءبىراق، اكادەميالىق بىلىمگە قاتىسى بولمايدى. ال، دەموكراتيالىق پارتيا امەريكاعا بەت بۇراتىن ازاماتتىق قوعامدى قالىپتاستىرۋعا دەن قويعان. ولار جۋرناليستەر مەن اكتيۆيستەرگە كوپتەگەن باعدارلاما ۇسىندى، - دەيدى ساراپشى.
قورىتا ايتقاندا ەل ازاماتتارى ا ق ش- قا ۆيزا تالاپتارىن ورىنداپ، زاڭ نورمالارىن ساقتاپ بارادى.
- ونىڭ ۇستىنە، سانى از بولسا دا ا ق ش ەكونوميكاسىنا ۇلەس قوسىپ جاتقان وتانداستارىمىز بار. سوندىقتان قاندايدا ءبىر بيۋروكراتيالىق ماسەلە تۋىنداسا دا، تولىقتاي تىيىم سالىنبايدى، - دەپ ءتۇيدى جانەركە قايرات قىزى.
ەسكە سالساق، ترامپ بيلىككە كەلە سالا ا ق ش- تا جۇمىس ىستەۋگە رۇقسات بەرەتىن ميگراتسيالىق قوسىمشانىڭ جۇمىسىن توقتاتقان بولاتىن.