ترامپتى ۇلىقتاۋ راسىمەنەن كەيىن بايدەن مەن حارريس نەمەن اينالىسادى
استانا. KAZINFORM — دونالد ترامپتى ۇلىقتاۋ راسىمىنەن كەيىن ا ق ش پرەزيدەنتى دجو بايدەن مەن ۆيتسە-پرەزيدەنت كامالا حارريستىڭ بولاشاعى قالاي قالىپتاسادى. وسى ورايدا بۇل لاۋازىم يەلەرىنىڭ الداعى قىزمەتىنە قاتىستى Kazinform-نىڭ مەنشىكتى ءتىلشىسى جاۋاپ ىزدەپ كوردى.

20-قاڭتاردان كەيىن 82 جاستاعى دجو بايدەننىڭ بوس ۋاقىتى كوبىرەك بولادى جانە ول ساياساتقا ورالۋعا تىرىسپاۋى مۇمكىن.
ول ءوزىنىڭ قازىرگى قىزمەتىنەن سوڭ الداعى جوسپارى تۋرالى كوپشىلىك الدىندا از ايتتى. دەگەنمەن، ساراپشىلار بۇل تۇرعىدا ءبىراز پىكىردى العا تارتىپ وتىر. بايدەن قاراجات جيناۋ جانە ءوزىنىڭ پرەزيدەنتتىك كىتاپحاناسىنىڭ جوسپارلارى بويىنشا جۇمىستى باستاۋعا باسىمدىق بەرۋى ىقتيمال.
بۇل نىسان ونىڭ تۋعان جەرى دەلاۆەر شتاتىندا بولۋى مۇمكىن. ول وسى وڭىردەن 36 جىل سەناتور بولعان جانە پرەزيدەنت قىزمەتىن اتقارعان كەزدە دەمالىس كۇندەرىنىڭ ءبىراز ۋاقىتىن وسىندا وتكىزگەن. مىسال رەتىندە باراك وبامانىڭ پرەزيدەنتتىك ورتالىعىن ايتۋعا بولادى، ونىڭ چيكاگوداعى كىتاپحانا مەن مۇراجايىنىڭ قۇرىلىسى 2026-جىلى اياقتالۋى ءتيىس.
سونىمەن قاتار، دجو بايدەن ءۇشىنشى كىتاپ جازۋى مۇمكىن. ول وسىعان دەيىن ەكى ەستەلىك جازعان، ياعني 2007-جىلى جاريالانعان «Promises to Keep» (ۋادەنى ورىنداۋ) جانە 2017-جىلى شىققان «Promise Me ،Dad» اتتى تۋىندىلارى بار.
دجو بايدەن پرەزيدەنتتىكتەن كەتكەننەن كەيىن اتقاراتىن جۇمىسىنا قاتىستى قىزىق ءبىر يدەيانى ايتقان ەدى. بىلتىر تامىزدا سايلاۋالدى ۇگىت-ناسيحات جۇمىستارىن توقتاتقاننان كەيىن شامامەن ءبىر اي وتكەن سوڭ، بايدەن ينتەرنەت-كونتەنت جاساۋشىلارعا ارنالعان ءىس-شارادا ءسوز سويلەگەن بولاتىن.
سول كەزدە ول: «مەن سىزدەردى اق ۇيگە نەگە شاقىردىم؟ ويتكەنى مەنى جۇمىس ىزدەپ جۇرگەن ادامداردىڭ ءبىرى دەپ ساناڭىزدار»، - دەپ ازىلدەگەن.
بىرنەشە اپتادان كەيىن دجەسسيكا البا اق ۇيدە لاتىنامەريكالىق مۇرانىڭ ايلىعىن اتاپ وتۋگە كومەكتەسكەن كەزدە، بايدەن وزىنە جۇمىس تابۋ ءۇشىن جاقىن ارادا ونەر جۇلدىزىنىڭ ىسكەرلىك بايلانىستارى قاجەت بولۋى مۇمكىن دەپ قالجىڭدادى. «دجەسسيكا، ەگەر مەن شىنىمەن جاقسى ناتيجە كورسەتسەم، مۇمكىن جۇمىس تاۋىپ بەرەرسىڭ؟»، - دەپ ايتقان ەدى.
جەلتوقسان ايىندا كەننەدي ورتالىعىنىڭ قۇرمەتتى مەيماندارىنا ارنالعان ءىس-شارادا ول وسى تەكتەس ءازىل ايتقان ەدى. «ەگەر مەن قينالسام، ساعان كەلەمىن، دوسىم»، - دەدى بايدەن تانىمال اكتەر روبەرت دە نيروعا قاراتا ايتقان سوزىندە.
قازىرگى قىزمەتىنەن كەتەتىن كامالا حارريستىڭ كەلەسى قادامى ءۇشىن ءبىراز نۇسقالار ايتىلىپ وتىر. ءبىرىنشىسى - كىتاپ جازۋ بولۋى مۇمكىن.
كامالا حارريس سايلاۋدا دونالد ترامپقا جەڭىلگەننەن بەرى پرەزيدەنت سايلاۋىندا جەڭىسكە جەتۋ ءۇشىن 107 كۇندىك سپرينت تۋرالى كوپشىلىك الدىندا از سويلەدى.
كوممۋنيكاتسيالار جونىندەگى ديرەكتور ەشلي ەتەن ۆيتسە-پرەزيدەنت ۇلگى الارلىق تاجىريبەسى بار تاريحي تۇلعا ەكەنىن، ول Covid-پەن كۇرەستە، ا ق ش- تا ەكونوميكانى قالپىنا كەلتىرۋدە جانە ايەلدەر قۇقىعىن قورعاۋدا كوشباسشى بولعانىن اتاپ ءوتتى. ونى 70 ميلليوننان استام ازامات قولداپ وتىر.
بۇدان بولەك، كامالا حارريس 2026-جىلى كاليفورنيا گۋبەرناتورى، 2028-جىلى پرەزيدەنتتى سايلاۋ كەزىندە كانديدات رەتىندە قاتىسۋى مۇمكىن ەكەنى دە ايتىلدى.
ۆيتسە-پرەزيدەنت ءوزىنىڭ ساياسي مۇمكىندىكتەرىنەن باس تارتپايتىنىن ايتىپ، «مەن كۇرەستى جالعاستىرامىن» دەپ بىرنەشە مارتە جاريالاعان. جاقىن ارادا كامالا حارريس پەن ونىڭ كەڭەسشىلەرى دونالد ترامپقا قالاي جانە قاشان قارسى شىعاتىنىن ايقىنداۋ باعىتىندا، سونداي-اق دەموكراتيالىق پارتياداعى ءوزىنىڭ ماڭىزدى ءرولىن قالپىنا كەلتىرۋ جولىندا جۇمىس ىستەۋى ىقتيمال.
2028-جىلداعى ۇمىتكەرلەرگە قاتىستى بولعان جەدەل ساۋالنامادا كامالا حارريستىڭ رەيتينگى 41 پايىزدى كورسەتتى. بۇل ءوز كەزەگىندە ونىڭ گەۆين نيۋسوم، دجوش شاپيرو، تيم ۋولز، پيت بۋتتيدجەچ، الەكساندريا وكاسيو-كورتەس، گرەتحەن ۋيتمەر، ەندي بەشير سياقتى دەموكراتتاردان الدا تۇرعانىن بايقاتتى.
ول وسى ەكى لاۋازىمدى الۋعا بىردەن قاتىسا المايدى. سوندىقتان سونىڭ ءبىرىن تاڭداۋ بويىنشا ءبىراز ويلانادى.
- ول اسىعىس شەشىم قابىلدايتىن ادام ەمەس. كەيدە وعان ارەكەت ەتۋ ءۇشىن وتە ۇزاق ۋاقىت قاجەت. سوندىقتان مەن ونىڭ كەلەسى قادامىنىڭ قالاي جاسالاتىنىن بىلمەيتىنىنە كەپىلدىك بەرە الامىن، - دەدى كامالا حارريستىڭ بۇرىنعى كومەكشىسى برايان بروكاۋ.
سونىمەن قاتار ول ك. حارريستىڭ الداعى تاڭداۋىنا قاتىستى پىكىر ايتتى.
— ول گۋبەرناتورلىققا داۋىسقا تۇسە الا ما؟ ءيا، قاتىسا الادى. دەگەنمەن، ول گۋبەرناتورلىققا ۇمىتكەر رەتىندە قاتىسقىسى كەلمەيدى دەپ ويلامىن. بۇل لاۋازىمعا قاتىستى تارتىستا ول جەڭە الا ما؟ ارينە، جەڭۋ مۇمكىندىگى زور. بۇل جۇمىس وعان ۇناي ما؟ بۇل سۇراققا ناقتى جاۋاپ بەرە المايمىن. ول قايتادان پرەزيدەنت لاۋازىمىنا ۇمىتكەر بولا الا ما؟ ابدەن مۇمكىن، دەدى برايان بروكاۋ.
بۇدان بۇرىن حابارلانعانداي، ا ق ش پرەزيدەنتى رەتىندەگى قوشتاسۋ سوزىندە دجو بايدەن امەريكالىقتارعا بايلىق پەن بيلىكتى وليگارحتار توبىنىڭ قولىندا شوعىرلاندىرۋ قاۋپى تۋرالى ەسكەرتتى.
ەسكە سالساق، بىلتىر قاراشا ايىنىڭ باسىندا كامالا حارريس دونالد ترامپقا قوڭىراۋ شالىپ، پرەزيدەنتتىك سايلاۋداعى جەڭىسىنە قۇتتىقتاۋ ايتتى.