تراۆماتولوگ دارىگەرلەر استانالىقتارعا ۇندەۋ جاسادى

استانا. KAZINFORM - قىس مەزگىلىنە قاراماستان ەلوردادا بالالاردىڭ تەرەزەدەن قۇلاۋ فاكتىلەرى ازايماي تۇر. وسى ماسەلەگە قاتىستى دارىگەرلەر استانالىقتارعا ۇندەۋ جاسادى.

قوعامدىق دەنساۋلىق ساقتاۋ باسقارماسىنىڭ مالىمەتىنشە، جىل باسىنان بەرى جوعارى قاباتتىڭ تەرەزەسىنەن ءۇش بالا قۇلاپ كەتكەن.

دارىگەرلەر اتاپ وتكەندەي، بالالاردىڭ تەرەزەدەن قۇلاپ كەتۋىنە قاتىستى قايعىلى وقيعالاردىڭ ارتىندا اتا-انانىڭ ابايسىزدىعى جاتىر.

- جىل باسىندا اۋرۋحانامىزدىڭ جانساقتاۋ بولىمىنە ءتۇرلى جاراقات العان نەمەسە سۇيەكتەرى سىنعان ەكى بالا اۋىر حالدە جەتتى. كەيىن ولار مەديتسينا قىزمەتكەرلەرىنىڭ باقىلاۋىمەن تراۆماتولوگيا بولىمىنە اۋىستىرىلدى. بالالاردا كوبىنەسە ومىرتقانىڭ، قولدىڭ جانە اياقتىڭ سىنۋى، باس ميىنىڭ جاراقاتى جانە اعزالارىنىڭ جارىلۋى بولادى. ءبىز ەرەسەكتەردەن بالالارىن ۇيدە جالعىز قالدىرماۋىن قاتاڭ تۇردە تالاپ ەتەمىز. ونىڭ ارتى قايعىلى وقيعاعا اينالۋى مۇمكىن، - دەپ ەسكەرتتى استانا قالاسىنداعى № 2 كوپسالالى قالالىق بالالار اۋرۋحاناسىنىڭ تراۆماتولوگيا ءبولىمىنىڭ مەڭگەرۋشىسى بايماحانبەت ءسادۋوۆ.

اۋرۋحانانىڭ مالىمەتىنشە، وتكەن جىلى بالالاردىڭ تەرەزەدەن قۇلاۋىنىڭ 63 وقيعاسى تىركەلدى، ونىڭ ىشىندە 33 بالا اۋىر جاعدايدا اۋرۋحاناعا جاتقىزىلدى؛ 4 جاعدايدا بالا قايتىس بولدى.

ەرەسەكتەرگە ارنالعان قاراپايىم قاۋىپسىزدىك ەرەجەلەرى تۋرالى ەسكەرتۋ:

* تەرەزەسى اشىق نەمەسە بالكون ەسىگى اشىق بولمەدە بالالاردى ەشقاشان جالعىز قالدىرماڭىز.
* بالالاردى تەرەزەنىڭ الدىنا شىعۋىنا جول بەرمەڭىز.
* تەرەزەنىڭ الدىنا شىعىپ الۋعا ىڭعايلى جيھازدار بولماۋى قاجەت.
* تەرەزەلەردى ارنايى قۇلىپتاۋ قۇرىلعىلارىمەن جابدىقتاۋ قاجەت.

وسى جاعدايدا موسكيت تورلارىنىڭ قاۋىپتىلىگىنە دە كوڭىل ءبولۋ كەرەك.

- ماسەلە مىنادا، موسكيت تورلارى ءقاۋىپسىز بولىپ ەلەستەۋى مۇمكىن. ال شىن مانىندە موسكيت تورلارى، ءتىپتى، كىشكەنتاي بالانىڭ سالماعىن كوتەرە المايدى، - دەپ قوستى دارىگەر.