ترامپ: زاڭسىز يمميگرانتتار ءۇشىن باسپانا بولعان قالالار قارجىلاندىرۋدان ايىرىلادى

استانا. KAZINFORM - ا ق ش بيلىگى قۇجات ازىرلەپ جاتىر، وعان سايكەس زاڭسىز ميگرانتتارعا پانا ۇسىناتىن كەز كەلگەن قالا نەمەسە شتات فەدەرالدىق قارجىلاندىرۋدان ايىرىلۋى مۇمكىن، دەپ حابارلايدى تاسس.

بۇل تۋرالى ا ق ش-تىڭ بۇرىنعى پرەزيدەنتى دونالد ترامپ مالىمدەدى.

- پانا ۇسىناتىن قالالارعا ەندى جول جوق. ولار قۇربانداردى ەمەس، قىلمىسكەرلەردى قورعايدى. ەلىمىزدى ماسقارا ەتىپ، بۇكىل الەمگە كۇلكىگە قالدىرادى. ءبىز وسىعان جول بەرەتىن كەز كەلگەن قالا نەمەسە شتاتتى فەدەرالدىق قارجىلاندىرۋدان ايىرۋعا مۇمكىندىك بەرەتىن قۇجاتتار دايىنداپ جاتىرمىز، - دەپ جازدى ترامپ ءوزىنىڭ Truth Social الەۋمەتتىك جەلىسىندەگى پاراقشاسىندا.

ترامپ بۇعان دەيىن دە ا ق ش-تىڭ كوشى-قون ساياساتىن قاتاڭداتۋ قاجەتتىگىن بىرنەشە رەت ايتقان بولاتىن.

20-قاڭتاردا پرەزيدەنت قىزمەتىنە كىرىسكەننەن كەيىن ول مەكسيكامەن شەكارادا توتەنشە جاعداي رەجيمىن ەنگىزۋ تۋرالى جارلىققا قول قويدى.

ا ق ش ىشكى قاۋىپسىزدىك مينيسترلىگى قۇقىق قورعاۋ ورگاندارىنىڭ وكىلەتتىگىن كەڭەيتىپ، زاڭسىز ميگرانتتاردى ەلدەن يمميگراتسيالىق سوتتىڭ شەشىمىنسىز، ياعني جەدەلدەتىلگەن تارتىپپەن دەپورتاتسيالاۋعا رۇقسات بەردى. New York Post گازەتىنىڭ ىشكى قاۋىپسىزدىك مينيسترلىگىندەگى دەرەككوزىنە سىلتەمە جاساپ حابارلاۋىنشا، ترامپتىڭ يناۋگۋراتسياسىنان كەيىن ەلدەن 100 مىڭنان استام ادام شىعارىلعان.

ايتا كەتەلىك ترامپ ميگرانتتارعا كۇنىنە 1000 دوللارعا جۋىق ايىپپۇل سالۋدى جوسپارلاپ وتىرعانى تۋرالى جازعان ەدىك.