ترامپ پۋتيننىڭ اسكەري ارەكەتتەردى توقتاتۋ تۋرالى ايتقانىنا قاتىستى پىكىر ءبىلدىردى

استانا. KAZINFORM - ناتو باس حاتشىسى مارك ريۋتتەمەن كەزدەسۋ بارىسىندا دونالد ترامپ رەسەي پرەزيدەنتى ۆلاديمير پۋتيننىڭ ىقتيمال بىتىمگە قاتىستى «وتە ءۇمىت كۇتتىرەتىن مالىمدەمە» جاساعانىن ايتتى، دەپ حابارلايدى «امەريكا داۋىسى».

ا ق ش پرەزيدەنتى دونالد ترامپ بەيسەنبى كۇنى رەسەي پرەزيدەنتى ۆلاديمير پۋتيننىڭ رەسەي مەن ۋكراينا اراسىنداعى اسكەري قيمىلداردى توقتاتۋ تۋرالى «وتە ءۇمىت كۇتتىرەتىن مالىمدەمە» جاساعانىن، ءبىراق ونىڭ «تولىق ەمەس» ەكەنىن مالىمدەدى.

- مەن ونىمەن كەزدەسكىم نەمەسە سويلەسكىم كەلەدى (تەلەفون ارقىلى). ءبىراق ءبىز بۇل ماسەلەنى تەز ارادا شەشۋىمىز كەرەك، - دەدى دونالد ترامپ اق ۇيدە ناتو باس حاتشىسى مارك ريۋتتەنى قابىلداۋ بارىسىندا.

ماسكەۋدە ءوتىپ جاتقان كونسۋلتاتسيالارعا توقتالعان ا ق ش پرەزيدەنتى ولاردىڭ بارىسىندا «قورىتىندى كەلىسىمنىڭ كوپتەگەن ەگجەي- تەگجەيى» تالقىلانعانىن اتاپ ءوتتى.

بۇعان دەيىن رەسەي پرەزيدەنتى ۆلاديمير پۋتين اسكەري قيمىلداردى توقتاتۋ شارتتارى تۋرالى پىكىر بىلدىرگەن بولاتىن.

ا ق ش پرەزيدەنتىنىڭ تاياۋ شىعىستاعى ارنايى وكىلى ستيۆ ۋيتكوفف رەسەي باسشىلىعىمەن كەلىسسوزدەر جۇرگىزۋ ءۇشىن ماسكەۋگە باردى.