ترامپ: پۋتين ۋكرايناداعى سوعىستى سوزىپ، رەسەيدىڭ «تۇبىنە» جەتىپ جاتىر
استانا. KAZINFORM - ا ق ش پرەزيدەنتى دونالد ترامپ رەسەي باسشىسى ۆلاديمير پۋتين ۋكراينامەن سوعىستى توقتاتۋ تۋرالى كەلىسىم جاساسۋدان باس تارتىپ، «رەسەيدىڭ تۇبىنە جەتىپ جاتىر» دەدى.

ول سوعىستى توقتاتۋ پۋتيننىڭ وزىنە پايدا اكەلەتىنىن ايتتى.
«مەن پرەزيدەنت پۋتينمەن سويلەسۋىم كەرەك، ءبىز مۇنىڭ ءبارىن انىقتاۋعا ءتيىسپىز»، - دەدى ترامپ ءبىرقاتار بۇيرىققا قول قويعاننان سوڭ جۋرناليستەرمەن سويلەسكەن كەزىندە.
ترامپتىڭ سوزىنشە، رەسەي ۋكراينادان ۇلكەن جانە «ولاردىڭ جوعالتاتىن ساربازى دا كوپ».
«ءبىراق ەلدى بۇلاي باسقارعانى - ءبىرءتۇرلى»، - دەدى ول.
ترامپ سونداي-اق جاقىن ارادا پۋتينمەن كەزدەسپەك نيەتتە، ءبىراق مۇنىڭ ناقتى كۇنى ءالى بەلگىلەنبەگەنىن ايتتى.
ترامپ ءۇش جىلعا جۋىق ۋاقىتقا سوزىلعان سوعىس تۋرالى «ادامداردىڭ كوپشىلىگى سوعىس ءبىر اپتادا اياقتالادى دەپ ويلادى. مەنىڭ ويىمشا، ونىڭ (پۋتين) بۇل سوعىستى اياقتاعانى دۇرىس بولار ەدى» دەدى.
ترامپ ۋكراينا پرەزيدەنتى ۆلاديمير زەلەنسكي قاقتىعىستى توقتاتۋ تۋرالى كەلىسىمگە كەلگىسى كەلەتىنىن، ال ۆلاديمير پۋتين ۋكراينامەن سوعىستى توقتاتۋ تۋرالى كەلىسىم جاساماي، «رەسەيدىڭ تۇبىنە جەتىپ جاتقانىن» ايتتى.
«زەلەنسكي مامىلە جاساعىسى كەلەدى. پۋتين مۇنى قالاي ما، جوق پا - بىلمەيمىن. ول مامىلەگە كەلۋى كەرەك. مەنىڭ ويىمشا، ول كەلىسىم جاساماي، رەسەيدىڭ تۇبىنە جەتىپ جاتىر»، - دەدى ترامپ.
ترامپ رەسەيگە قاتىستى سانكسيالاردى الىپ تاستاۋ تۋرالى سۇراققا باجدى تيىمدىرەك شارا رەتىندە قۇپ كورەتىنىن ايتتى.
ايتا كەتەيىك، ۆلاديمير پۋتين ترامپتى ەكىنشى مەرزىمگە پرەزيدەنت بولىپ سايلانۋىمەن قۇتتىقتاپ، نەگىزگى جاھاندىق ماسەلەلەردى، سونىڭ ىشىندە ۋكرايناداعى سوعىس پەن يادرولىق قارۋ تۋرالى تاقىرىپتى تالقىلاۋعا دايىن ەكەنىن جەتكىزدى.
دونالد ترامپ 20-قاڭتاردا ۇلىقتاۋ راسىمىندە انت بەرىپ، ا ق ش پرەزيدەنتى قىزمەتىنە رەسمي كىرىستى.