ترامپ تاعى دا بىرنەشە ءمينيستردىڭ كانديداتۋراسىن ۇسىندى
استانا. KAZINFORM - جاڭادان سايلانعان ا ق ش پرەزيدەنتى دونالد ترامپ سەيسەنبى كۇنى ساۋدا مينيسترلىگىنىڭ باسشىسى ەتىپ Cantor Fitzgerald كومپانياسىنىڭ باس ديرەكتورى گوۆارد ليۋتنيكتى تاڭداعانىن مالىمدەدى، دەپ جازادى ABC News.
ميللياردەر بيزنەسمەن گوۆارد ليۋتنيك ترامپتىڭ وتپەلى كەزەڭدەگى كومانداسىنىڭ تەڭ ءتوراعاسى قىزمەتىن اتقاردى. ول وتكەن پرەزيدەنتتىك سايلاۋ ناۋقانىندا دونالد ترامپقا ءجيى قوسىلىپ، دجون پولسون، ديۋك بيۋكەن جانە ۆۋدي دجونسون سياقتى كەيبىر ءىرى رەسپۋبليكالىق دونورلارمەن بىرگە كوپتەگەن قاراجات جيناۋ شارالارىن وتكىزدى.
سونداي-اق، ترامپ ليندا ماكماحوندى ءبىلىم ءمينيسترى ەتىپ تاڭداعانىن حابارلادى. ليندا ماكماحون - ترامپتىڭ اۋىسپالى كومانداسى جەتەكشىلەرىنىڭ ءبىرى. ول ساۋدا مينيسترلىگىنە لايىق دەپ سانالدى. ماكماحون بۇعان دەيىن ترامپتىڭ ءبىرىنشى مەرزىمىندە شاعىن بيزنەس اكىمشىلىگىن باسقارعان.
ساراپشىلاردىڭ پىكىرىنشە، ليندا ماكماحوننىڭ ءبىلىم بەرۋ سالاسىنداعى تاجىريبەسى از. ونىڭ بۇل سالاداعى ەڭ ۇلكەن تاجىريبەسى كوننەكتيكۋتتا بولدى، ول 2009-جىلى زەينەتكە شىعىپ، سەناتقا ۇمىتكەر بولعانعا دەيىن شتاتتىڭ ءبىلىم كەڭەسىندە ءبىر جىل جۇمىس ىستەگەن.
ايتا كەتەيىك بۇل تاعايىنداۋلار سەناتتىڭ ماقۇلداۋىن تالاپ ەتەدى.
بۇعان دەيىن ترامپ ءوزىنىڭ بولاشاق اكىمشىلىگىنە العاشقى تاعايىنداۋلاردى جاريالاعان بولاتىن. سودان كەيىن ول پەنتاگون مەن تسرۋ باسشىلارىن اتادى جانە ماسكقا ۇكىمەتتىڭ تيىمدىلىك دەپارتامەنتىن باسقارۋدى ۇسىندى.
ول سونداي-اق دەنساۋلىق ساقتاۋ مينيسترلىگىنىڭ باسشىسى لاۋازىمىنا كىشى كەننەديدىڭ كانديداتۋراسىن ۇسىندى، ا ق ش مەملەكەتتىك دەپارتامەنتى مەن ۇلتتىق بارلاۋ باسقارماسىنىڭ باسشىلارىن جانە اق ءۇيدىڭ جاڭا باسپا ءسوز حاتشىسىن تاعايىندادى.
سونىمەن قاتار، ترامپ ا ق ش- تىڭ ەنەرگەتيكا ءمينيسترى لاۋازىمىنا Liberty Energy مۇناي كومپانياسىنىڭ باسشىسىن تاڭدادى.
