ترامپ رەسەيدى ۋكرايناداعى اسكەري قاقتىعىستى توقتاتۋعا شاقىردى
استانا. KAZINFORM - ا ق ش پرەزيدەنتى دونالد ترامپ رەسەيدى ۋكرايناداعى اسكەري قاقتىعىستى توقتاتۋ جونىندە كەلىسسوزدەر جۇرگىزۋگە شاقىرىپ، ديپلوماتيا قاجەت ەكەنىن ايتتى. سونىمەن قاتار، قاقتىعىس جالعاسا بەرسە، ەكونوميكالىق تۇرعىدان زاردابى اۋىر بولاتىنىن ەسكەرتتى، دەپ حابارلايدى kazinform.

- رەسەيگە زيان كەلتىرگىم كەلمەيدى. مەن ورىس حالقىن جاقسى كورەمىن جانە راديكالدى سولشىلداردىڭ ايىپتاۋلارىنا قاراماستان پرەزيدەنت پۋتينمەن ءارقاشان وتە جاقسى قارىم - قاتىناستا بولدىم. ءبىز رەسەي 60000000 عا جۋىق ادامنىڭ ءومىرىن قيعان ەكىنشى دۇنيەجۇزىلىك سوعىستا جەڭىسكە جەتۋگە كومەكتەسكەنىن ەشقاشان ۇمىتپاۋىمىز كەرەك. وسىنىڭ ءبارىن ەسكەرە وتىرىپ، ەكونوميكاسى قۇلدىراپ بارا جاتقان رەسەيگە جانە پرەزيدەنت پۋتينگە ۇلكەن جاقسىلىق جاسايىن دەپ تۇرمىن. قازىر- اق مامىلەگە كەلىڭىزدەر دە، مىنا ميعا قونىمسىز سوعىستى توقتاتىڭىز! ارتى جاقسى بولمايدى، - دەپ جازدى ترامپ Truth Social پاراقشاسىندا.
- ەگەر ءبىز جاقىن ارادا «مامىلەگە» كەلمەسەك، رەسەيدىڭ امەريكا قۇراما شتاتتارىنا جانە باسقا دا ەلدەرگە ساتاتىن بارلىق زاتتارىنا جوعارى سالىقتار، تاريفتەر مەن سانكسيالار ەنگىزۋدەن باسقا مەندە امال قالمايدى. مەن پرەزيدەنت بولعاندا ەشقاشان باستالمايتىن سوعىستى اياقتايىق! ءبىز وڭاي نەمەسە قيىن جولدى تاڭداي الامىز - ارينە، وڭاي جول ءارقاشان جاقسى. «مامىلە جاساۋ» ۋاقىتى كەلدى. ەندى ادامدار ولمەۋى كەرەك!!!، - دەپ جازدى.
بۇعان دەيىن ا ق ش پرەزيدەنتى دونالد ترامپ ءوزىنىڭ كومانداسىنا يناۋگۋراتسيادان كەيىن بىرنەشە كۇن ىشىندە رەسەي باسشىسى ۆلاديمير پۋتينمەن تەلەفون ارقىلى سويلەسۋدى ۇيىمداستىرۋدى تاپسىرعانى تۋرالى جازعان ەدىك. اڭگىمەلەسۋدىڭ ءبىر ماقساتى - ۋكرايناداعى قاقتىعىستى توقتاتۋ ءۇشىن الداعى ايلاردا جەكە كەزدەسۋدى تالقىلاۋ.