ترامپ قارجى جانە ساۋدا مينيسترلەرىنىڭ ۇگىتتەۋلەرىنەن كەيىن تاريفتەردى ۋاقىتشا توقتاتتى
استانا. KAZINFORM - ا ق ش پرەزيدەنتى دونالد ترامپ قارجى ءمينيسترى سكوتت بەسسەنتپەن جانە ساۋدا ءمينيسترى گوۆارد ليۋتنيكتپەن اڭگىمەلەسكەننەن كەيىن ەكونوميكالىق باج سالىعىن ەنگىزۋدى ۋاقىتشا توقتاتتى. بۇل تۋرالى ت ا س س حابارلادى.
WSJ دەرەگى بويىنشا، مينيسترلىكتەردىڭ باسشىلارى ترامپتى اگرەسسيۆتى تاريفتىك جوسپاردى توقتاتۋعا كوندىرگەن. الايدا ا ق ش پرەزيدەنتىنىڭ ساۋدا جونىندەگى كەڭەسشىسى پيتەر ناۆاررو باج سالىعىن ساقتاپ قالۋدى تالاپ ەتكەن. بەسسەنت پەن ليۋتنيكپەن اڭگىمەدەن كەيىن ترامپ Truth Social الەۋمەتتىك جەلىسىندەگى پاراقشاسىندا كەيبىر تاريفتەردىڭ كۇشىن ۋاقىتشا توقتاتۋ تۋرالى شەشىم قابىلداعانىن جاريالاعان.
گازەتتىڭ مالىمەتىنشە، 2 -ساۋىردە ترامپ ەنگىزگەن بىرنەشە ساۋدا تاريفى كۇشىنە ەنگەننەن كەيىن قور نارىقتارى كۇرت قۇلدىراعان. بۇل اق ۇيدە قاتتى الاڭداۋشىلىق تۋعىزدى.
سونىمەن قاتار، ترامپتىڭ ساۋدا كەڭەسشىسى ناۆاررو ا ق ش پرەزيدەنتى مەن مينيسترلىكتەر باسشىلارى اراسىنداعى اڭگىمەنى بىلمەگەنى دە حابارلاندى.
9 -ساۋىردە ترامپ كەلىسسوزدەر جۇرگىزۋگە دايىندىق بىلدىرگەن ەلدەرگە قاتىستى باج سالىعىن ارتتىرۋدى 90 كۇنگە توقتاتاتىنىن مالىمدەدى. بۇل ەلدەر ءۇشىن يمپورتتىق تاريف مولشەرى %10 دەڭگەيىندە ساقتالادى. بەسسەنتتىڭ ايتۋىنشا، بۇل توقتاتۋ كانادا مەن مەكسيكاعا دا قاتىستى.
سونىمەن قاتار، ا ق ش پرەزيدەنتى قىتايدان كەلەتىن ونىمدەرگە ارنالعان تاريفتەردى %125 عا دەيىن كوتەردى.
ايتا كەتەلىك ا ق ش پرەزيدەنتى دونالد ترامپ قىتاي ا ق ش تاۋارلارىنا سالىنعان %34 باج سالىعىن الىپ تاستاماسا، 9-ساۋىردەن باستاپ قىتايدان اكەلىنەتىن ونىمدەرگە %50 قوسىمشا باج سالىعىن ەنگىزەتىنىن مالىمدەدى.
