ترامپ پەن حارريستىڭ قايسىسى جەڭۋى مۇمكىن

استانا. KAZINFORM - ا ق ش-تا 5-قاراشادا وتەتىن سايلاۋدا پرەزيدەنتتىككە ۇمىتكەرلەردىڭ كەز كەلگەنى جەڭىسكە جەتۋى مۇمكىن. بۇعان ساۋالناما ناتيجەسى دالەل، دەپ حابارلايدى golosameriki.com.

New York Times باسىلىمى مەن سيەنا كوللەدجى جۇرگىزگەن ۇلتتىق ساۋالناما قورىتىندىلارىنا سايكەس، رەسپۋبليكالىق پارتيادان پرەزيدەنتتىككە ۇمىتكەر دونالد ترامپ پەن ونىڭ دەموكراتيالىق باسەكەلەسى، ۆيتسە-پرەزيدەنت كامالا حارريس سايلاۋدىڭ سوڭعى اپتالارىنداعى ساۋالنامالاردا ءىس جۇزىندە تەڭ بولدى.

جەكسەنبى كۇنى جاريالانعان ساۋالناما ترامپتىڭ حارريستەن ءبىر پايىزدىق تارماققا الدا كەلە جاتقانىن كورسەتتى، بۇل 5-قاراشاداعى سايلاۋدا كەز كەلگەن كانديدات جەڭۋى مۇمكىن ەكەنىن بىلدىرەدى.

قازىرگى پرەزيدەنت دجو بايدەن شىلدەدە دودادان شىعىپ كەتكەننەن كەيىن ترامپتىڭ سايلاۋالدى ناۋقانى بىرنەشە اپتا ىشىندە باياۋلاعانىمەن، سوڭعى ساۋالنامالار ونى قولداۋ كورسەتكىشى وزگەرىسسىز قالعانىن كورسەتتى.

ساۋالناما سايلاۋشىلاردىڭ حارريس تۋرالى كوبىرەك بىلگىسى كەلەتىنىن كورسەتتى، ال ولاردىڭ ترامپ تۋرالى پىكىرى نەگىزىنەن ۇيىمداستىرىلعان.

ساۋالنامادا سايلاۋشىلاردىڭ %28- ى دەموكراتيالىق پارتيانىڭ كانديداتى تۋرالى مولىراق اقپارات العىسى كەلەتىنىن ايتتى، ترامپ تۋرالى سايلاۋشىلاردىڭ تەك %9 ى وسىلاي دەگەن.

ساۋالناما سەيسەنبى كۇنگى پرەزيدەنتتىك پىكىرتالاس باسەكەنىڭ شەشۋشى ءساتى بولۋى مۇمكىن ەكەنىن كورسەتتى. حارريستىڭ جوسپارلاپ وتىرعان ساياساتى تۋرالى تولىعىراق ايتۋعا مۇمكىندىگى بار.

دودانىڭ باسەكەلى بولعانى سونشالىق، كەز كەلگەن ۇمىتكەر ءۇشىن از عانا جەڭىستىڭ ءوزى شەشۋشى بولۋى مۇمكىن.

حارريس ۇگىت ناسيحات جۇمىستارىن بەلسەندى جۇرگىزىپ كەلەدى، ءبىراق ب ا ق-قا وتە از سۇحبات بەردى.

سوڭعى ساۋالنامانىڭ نەگىزگى كورسەتكىشتەرى شىلدە ايىنىڭ سوڭىندا جاريالانعان New York Times/Siena College-دىڭ سوڭعى سالىستىرمالى زەرتتەۋىنە ۇقساس. بۇل ساۋالنامادا دا ترامپ قاتەلىك شەگىندەگى ءبىر پايىزدىق تارماققا الدا بولدى.

اۆتور
ەركەجان سماعۇلوۆا