ترامپ مەكسيكا مەن كانادانىڭ اۆتووندىرۋشىلەرىنە باج سالىعىن توقتاتتى
استانا. KAZINFORM - ا ق ش پرەزيدەنتى دونالد ترامپ جەتەكشى سالا وكىلدەرىمەن كەلىسسوزدەر جۇرگىزگەن مەكسيكا مەن كانادانىڭ اۆتوكولىك وندىرۋشىلەرىنە تاريفتەر بويىنشا ءبىر ايلىق مەرزىم بەردى، دەپ حابارلايدى Euronews.
بۇل جاڭالىقتان كەيىن اۆتووندىرۋشىلەردىڭ اكسيالارى كوتەرىلدى.
- ءبىز اۆتووندىرۋشىلەردىڭ «ۇلكەن ۇشتىگىمەن» سويلەستىك. ءبىز USMCA ارقىلى تاسىمالداناتىن كەز كەلگەن كولىكتەرگە ءبىر ايلىق تاريفتەن باس تارتۋدى قامتاماسىز ەتەمىز، - دەدى اق ءۇيدىڭ باسپا ءسوز حاتشىسى كارولين ليەۆيتت سارسەنبىدە. - ءوزارا تاريفتەر 2 - ساۋىردە كۇشىنە ەنەدى، ءبىراق USMCA عا قاتىسى بار كومپانيالاردىڭ ءوتىنىشى بويىنشا پرەزيدەنت ولاردى ەكونوميكالىق قيىنشىلىققا ۇشىراتپاۋ ءۇشىن ءبىر ايعا ۇزارتادى.
ءبىر كۇن بۇرىن، سەيسەنبىدە مەكسيكا مەن كانادادان كەلەتىن بارلىق يمپورتقا %25 تاريف، سونداي-اق قىتاي يمپورتىنا قوسىمشا %10 دىق تاريف كۇشىنە ەندى.
ترامپ سونىمەن قاتار وتكەن ايدا 2-ساۋىردەن باستاپ اۆتوموبيل، فارماتسيەۆتيكا جانە جارتىلاي وتكىزگىشتەر يمپورتىنا %25 باج سالىعىن ەنگىزەتىنىن مالىمدەدى. ول سونداي- اق 1-ساۋىردە كۇشىنە ەنەتىن تاريفتەردى ەنگىزۋگە باعىتتالعان ساۋدا قاتىناسىن تەكسەرۋ تۋرالى بۇيرىققا قول قويدى.
2020 -جىلدىڭ شىلدەسىندە NAFTA نى اۋىستىرعان امەريكا قۇراما شتاتتارى- مەكسيكا- كانادا كەلىسىمىنە (USMCA) سايكەس، ءۇش ەل اراسىنداعى ساۋداعا نولدىك تاريفتەرگە ساي بولۋ ءۇشىن كولىك بولشەكتەرىنىڭ %75 ى سولتۇستىك امەريكادا جاسالۋى كەرەك.
كەلىسىم 2026 -جىلدىڭ شىلدەسىنە دەيىن قايتا قارالۋى ءتيىس. سارسەنبىدە اق ءۇي شەنەۋنىكتەرى ستەللانتيس، فورد جانە General Motors جەتەكشىلەرىمەن كەزدەستى، دەدى ليەۆيتت.
ترامپ ۇسىنىسى اۆتوكولىك وندىرۋشىلەرگە ءوندىرىستى ا ق ش- قا قايتارۋعا ۋاقىت بەرەدى.
