ترامپ كونگرەستى ۇكىمەتتى ۋاقىتشا قارجىلاندىرۋ تۋرالى زاڭ جوباسىن قولداۋعا شاقىردى
استانا. KAZINFORM - ا ق ش ۇكىمەتىن قىركۇيەك ايىنىڭ سوڭىنا دەيىن قازىرگى دەڭگەيدە قارجىلاندىرۋدى قامتاماسىز ەتەتىن بۇل زاڭ جوباسىن وكىلدەر پالاتاسىنا رەسپۋبليكالىق كوپشىلىك كوشباسشىلارى ۇسىندى، دەپ حابارلايدى «امەريكا داۋىسى».
ا ق ش پرەزيدەنتى دونالد ترامپ رەسپۋبليكالىق پارتيا كوشباسشىلارى ۇسىنعان ۇكىمەتتى ۋاقىتشا قارجىلاندىرۋ تۋرالى زاڭ جوباسىن قۇپتاپ، بارلىق كونگرەسسمەندى ونى قولداۋعا شاقىردى.
بۇل تۋرالى ول Truth Social الەۋمەتتىك جەلىسىندە جازدى.
سەنبى كۇنى بۇرىن وكىلدەر پالاتاسىنداعى رەسپۋبليكاشىل كوشباسشىلار اقش ۇكىمەتىن قىركۇيەك ايىنىڭ سوڭىنا دەيىن قازىرگى دەڭگەيدە قارجىلاندىرۋدى كوزدەيتىن ۋاقىتشا قارجىلاندىرۋ تۋرالى زاڭ جوباسىن ۇسىندى.
رەسپۋبليكاشىل پارتيا باسشىلارىنىڭ ايتۋىنشا، 99 بەتتەن تۇراتىن زاڭ جوباسى قورعانىس شىعىندارىن شامامەن 6 ميلليارد دوللارعا ارتتىرادى، بۇل 2024 -قارجى جىلىمەن سالىستىرعاندا كوبىرەك. ال قورعانىسقا قاتىسى جوق شىعىندار شامامەن 13 ميلليارد دوللارعا قىسقارادى. سونىمەن قاتار ارداگەرلەردىڭ دەنساۋلىعىن قامتاماسىز ەتۋگە قوسىمشا 6 ميلليارد دوللار بولىنەدى.
زاڭ جوباسىندا قوسىمشا قارجىلىق «ەرەكشەلىكتەر» دە قاراستىرىلعان، سونىڭ ىشىندە ا ق ش- تىڭ ىشكى كىرىستەر قىزمەتىن (IRS) قارجىلاندىرۋدى 20 ميلليارد دوللارعا قىسقارتۋ جانە يمميگراتسيا جانە كەدەن پوليتسياسىنىڭ (ICE) دەپورتاتسيالاۋ وپەراتسيالارىنا قارجى ءبولۋدى ۇلعايتۋ.
رەسپۋبليكاشىل پارتيا كوشباسشىلارى زاڭ جوباسىنىڭ اق ۇيمەن ناقتى كەلىسىلگەنىن مالىمدەدى. قۇجاتتاعى قارجىلاندىرۋ دەڭگەيلەرى 2023 -جىلعى ەكىجاقتى قارجىلاندىرۋ كەلىسىمىندە بەلگىلەنگەن كورسەتكىشتەردەن تومەن.
دەموكراتتار بۇل ۇسىنىستى قولدامايدى، سوندىقتان رەسپۋبليكاشىلدارعا ونى وتكىزۋ ءۇشىن دەرلىك ءبىراۋىزدان قولداۋ قاجەت. وكىلدەر پالاتاسىنىڭ سپيكەرى مايك دجونسوننىڭ 218-214 ەسەبىندەگى ءالسىز كوپشىلىگىمەن قاتەلىككە جول بەرۋگە مۇمكىندىگى از. ەگەر وكىلدەر پالاتاسىنىڭ بارلىق مۇشەسى داۋىس بەرۋگە قاتىسسا، ول تەك ءبىر كونگرەسسمەننىڭ داۋىسىن جوعالتۋعا عانا مۇمكىندىك بەرە الادى.
بۇعان دەيىن دونالد ترامپ يلون ماسك پەن مينيسترلەر كابينەتى اراسىنداعى قارىم-قاتىناستى رەتتەۋگە تىرىسقانى تۋرالى حابارلانعان ەدى. ۇكىمەت تيىمدىلىگى دەپارتامەنتىنىڭ باسشىسى مينيسترلىكتەردىڭ جۇمىسىنا ارالاسۋى سالدارىنان كابينەت ىشىندە الاۋىزدىق كۇشەيىپ كەلەدى.
ايتا كەتەلىك ترامپ ا ق ش پەن كانادا اراسىنداعى شەكارالىق كەلىسىمدى قايتا قاراۋعا نيەتتى.
